Ka jingpynbna thma jong ka Sorkar ha u snem ba ladep ban ïakhun pyrshah ïa ka jingjyllei jong u drok ka dei ka sienjam kaba kongsan tam ban rat dyngkhong ïa ka jingjyllei jong u drok ha kane ka jylla Meghalaya. Ka long kaba sngew synei ban pyrkhat shaphang kito kiba la ngat ha ka shrip jong ka jingkyrni ha u drok. Ki longing kiba la ngat ha kane ka apot ki ïam kthang bad ki bynñiaw ïa la ki jong ki khun ki kti namarba ki tip shai ba wei ba la ngop ha u drok ka lawei jong ki kam don jingkyrmen shuh.
La ïohi shisha ïa ka jingïakhun thma jong ka tnat Pulit pyrshah ïa u drok lyngba ka jingïarap jong ka tnat syntiat ban kem beit naphang ïa ki nongkhaïi kiba wan kit ïa u drok nabar ka jylla. Ka East Khasi Hills District, ka East Jaiñtia Hills District bad ka Ribhoi ki dei ki distrik ha kane ka jylla kiba paw bha ha ka jingïoh kurup jong ki Pulit ïa u drok bad ka jingshah kem jong ki snar nongkhaïi.
Ka jingïohlad jong ki nongkhaïi drok nabar jylla ban wanrah ïa u drok sha Meghalaya ka dei ka jingdonkti jong ki nongkhaïi drok (Kingpin) trai Jylla kiba im da kamai spah bym hok ban pynjot ïa ka jingim jong ki samla kiba dang lung ka jingmut jingpyrkhat.
Ka jingshimkhia jong ka tnat Social Welfare ka Sorkar Jylla ban wanrah da ka ain bapyrkhing pyrshah ïa ki nongkhaïi drok ka long hadien ba la ïohi ba ka jingwan rung jong u drok sha kane ka jylla Meghalaya ka la long shaba palat liam bad katkum ka jingïoh jingkheiñ naduh u snem 2019 ka jingdon jong ki nongpyndonkam ïa u drok ka la kiew bha ha kane ka jylla bad ruh ha ki 5 tylli ki district jong ka jylla la ithuh kum ki jaka ba ka jur bha ka jingpyndonkam ïa u drok.
Lyngba ka DREAM project ïa kaba la pynbna paidbah ha u snem 2022, bad ka jingmynjur ïa ka Draft Policy kan pyllaitluid ïa ka Jylla Meghalaya na u drok.
Ka jingwanrah ïa ka aiñ Prevention of Illicit Traffic in Narcotic Drugs and Psychotropic Substances Act, 1988 (PITNDPS) ka dei ka por kaba biang tam bad ka sorkar ka la dei ban thaw noh mardor ïa ka Advisory Board khnang ba yn dup lah ban pynrung ïa ki kyndon hapoh kane ka aiñ.
Ka aiñ PITNDPS kan long kum ka bniat kaba nep ban pynap da ki kyndon batyngeh ïa ki kino kino ki briew kiba ju don dak sniew kum ki nongkhaïi drok lane ki briew kiba ju don bynta ha ka jingkhaïi drok, la ki dei kiba rit ne kiba heh, kin shah pynngat hapoh kane ka aiñ bad kin hap ngat ha ka jingshah set along kaba 3 bnai bad kaba lah ban pynjlan haduh shi snem kynthih.
Ka jingpynkhlaiñ jong ka Sorkar ïa ka Narcotic Cell ka dei ban treikam pura khnang ba ka tnat Pulit kan dup lah ban rat dyngkhong ïa ka jingjyllei jong u drok kumba la rat dyngkhong jong ki kam lehnoh ha kane ka jylla naduh ki snem baladep.
Ki Dorbar Shnong ki dei ban ïatreilang bad ki kynhun bapher bapher bad ki tnat treikam jong ka Sorkar khnang ban pynsuk ban kem naphang ïa ki nongkhaïi drok kiba pynjot ïa ka imlang ka sahlang.
Lada bishar bad lada tih bniah, kaba kongsan eh ka dei hi na ki rympei ing bad ki kmie ki kpa kim dei satia ban ai mon bad ai laitlan ïa la ki jong ki khun ban shu pan katba ki kwah bad ban pynleh kjeh than. Kane hi kan pynjot ïa ki khun ki kti namarba ki khun ïohmon kim ju long eiei hadien habud bad ki long pynban tang ki kruiñ kiba bamduh ïa la ka ing ka sem, ïa ka imlang ka sahlang bad ïa ka jaidbynriew.
Ka long kaba donkam ïa ki Balang ba kin kren bad kin pynsngewthuh ïa ki riewngeit halor ka jingshyrkhei jong u drok khnang ba ki khun samla kin lait na ki jingshah pynngop ha la ki paralok ha ki jingmlien kiba sniew namarba ynda la kyrni ki jingmlien kiba sniew lah eh ban bthat ïa ki kynjri jong ka, kumba ladep maham lypa u Myllung Soso Tham.
