Shillong, Jymmang 10 : Ka North-Eastern Hill University Teacher’s Association (NEHUTA) ha ka Sngi U Blei ka la kyntu ïa ka Voice of the People Party (VPP) bad ïa kiwei kiwei ruh ki Seng Saiñ Pyrthei ba kin buh ïa ka kam saiñ pyrthei shabar jong ka phyllaw (campus) ka University, haba kyntait ïa ka jingkam u Pro Vice-Chancellor halor ka jingslem ka kam thung nongtrei.
ïa kane la kynthoh da u President ka NEHUTA Prof Lakhon Kma haba jubab ïa ka khubor ba kdew ïa ka jingkren u President ka VPP Youth Wing Marbud Dkhar halor ka jingkren u PVC Prof S Umdor halor ka jingslem ki jingthung kam ha NEHU.
“Na ka liang ki seng saiñ pyrthei kynthup ka VPP, ka NEHUTA ka kwah ban kyntu ïa ki ba kim dei ban qan leh politik hapoh ka University” ong u Prof Kma ha ka kyrwoh.
“Shabar ka phyllaw ka NEHU, ki don pahuh ka jaka ban leh politik bad ïakhun elekshon” ong ka NEHUTA haba kynnoh ïa u PVC Prof S Umdor ba ula ïalam bakla ïa ki paidbah bad ka VPP Youth Wing halor balei ka jingpynbna laitkam ba 154 ha ka group B bad C myn ha ka 3 tarik Naiwieng, 2023 ka la shu kut.
Ka sngi ba khadduh na ka bynta ka jingpdiang ïa ki kot ki sla ka dei 12 tarik Nohprah 2023 bad ka jingpynbna laitkam ka la kut noh ha ka 2 tarik Naiwieng 2024.
“Ka long kaba bakla ïa u PVC ban ong ba ki kam ban pynïaid ïa ka jingthung kam ym shym la lah ban pyndep bad ka la shu kut noh namar ka jingthut ha ka jingtreikam jong ka University namar ki kynrum kynram hapoh ïing” ong u Prof Kma.
Ula kdew ba ka jingïashah thngan jong ki samla pule kala sdang tad hadien ba la kut noh ka jingpynbna laitkam.
“Ka jingshah thngan ki samla pule kaba la kyrshan pura da ki Nonghikai bad ki Nongtrei, kala sdang ha ka 5/11/2024 bad kala kut ha ka 21/11/2024” ula ong.
“Ka jingpynbna laitkam ka la kut ka por treikam ha ka sien kaba lai ym namar ka jingïakhih hynrei namar ka jingïai jah trei jong u Vice Chancellor ha katei ka por, ka jingbym shimkhia pura jong u ïa ka bha ka miat ka University bad ka jingkiar syndon ban khmih ïa ki kam jong ka NEHU ha ka samoi treikam jong u” kynnoh u Prof Kma haba kdew ïa u VC barim Prof PS Shukla.
“Hapdeng ka sngi ba khatduh kata 12/12/2023 bad 2/11/2024, u Prof Shukla u khlem leh ei ei ban thung briew ha kitei ki kam ba lait bad u Prof Umdor ula pyrshang ban ïalam bakla ïa ki paidbah” ula ong.
“U Prof Umdor ula pyrshang ban ïada ïa ka jingbym lah treikam pura jong u VC ha ka ban pyndep ïa ki kam ban pynïaid ïa ka jingthung kam thung jam ha ka sien kaba lai” ula kynnoh.
Halor ka VPP Youth Wing, u Prof Km ula ong “Ka jingduna ki jingtip bad ki jingshisha ka la ailad ïa u PVC ban ïalam bakla ïa ki lada ki khubor ki dei kiba shisha kumba ki mih ha ki kot khubor. Nga kwah eh ba ki la dei ban da leh homework bha hashuwa ba kin leit ïakren ïa ki bor ka Unviversity, khnang ban nym lah ban ïalam bakla ïa ki bad ïa ki paidbah ka Jylla”.
“Ngi kwah ban kyntu ïa u PVC ba lada u nud ban kren shai kdar bha bad sangeh ïalam bakla ïa ki paidbah ka Jylla” ula bynrap.
