Lada ym weng ïa ka jingithuh kur ïa ki bymdei trai ri trai muluk: JSU

Jowai, Jymmang 10: Ka Jaiñtia Students’ Union (JSU) hadien ba ka la ïohi ïa ka jingpynmih list kaba ar jong ka Jaiñtia Hills Autonomous District Council (JHADC) halor ka jingithuh ïa kiwei pat ki kur bym dei ki trai ri trai muluk kiba kynthup ïa ki Biate, Karbi, Hmar bad ki Kuki na ka liang ka Seng mardor ka la dawa ban dei ban weng noh ïa katei ka jingithuh ïa kitei ki jait kur.
Ka JSU ka la pynrem jur ïa kane ka jingleh jong ka JHADC, da kaba kynthoh ruh ba kane ka lah ban ktah ïa ka pateng ka ban wan jong ka ri Jaiñtia namar ba kitei ki jait kur kiba dang shu kynthup ha katei ka list, ki dei na kiwei pat ki jait bynriew bad ki dei ruh kiba shim jait kpa.
Ka JSU ka pynpaw ba kane ka jingleh jong ka JHADC ka buh jingma ïa ka jingithuh jong ki nong Jaiñtia bad ha ka juh ka por kan pyntlot bor ïa ka riti ka dustur jong ka jingshim jait na ka kmie kaba dei ka rukom tynrai jong ki nong Jaiñtia. Lada ka JHADC kan pdiang ïa kitei ki kur, ha kawei ka sngi ki rukom kheiñ kur ne shim jait na ka kmie kan sa kylla rit paid ha la ka jong ka ri bad ka lah ruh ban duh ban dam noh.
Ka JSU ka la pynrem jur ïa kane ka jingshim rai jong ka Executive Committee (EC) ka JHADC ban pynmih ia kane ka list jingithuh ïa kitei ki jait kur khlem kano kano ka jingïasyllok bad ki nongïalam shnong kumjuh ki nongïalam kur jong ka Jaiñtia Hills.
Na ka liang ka JSU ka la dawa na ka JHADC ba ka dei ban weng ne pyndam noh ïa kane ka jingithuh ïa kitei ki jait kur hapoh 3 (lai) taïew, lym kumta ka Seng kan sa khang ta la ïa ka ophis JHADC bad kan khot pynlong ruh ïa ki jingïalang paidbah ban pyrshah ïa katei ka jingleh jong ka JHADC.
Kumta ka JSU ka ong ba lada ka JHADC ka kwah ban tehlakam ïa ka shongsuk shongsaiñ hapoh ka thaiñ ka dei ban weng noh shisyndon ïa katei ka rai kaba ka la dep ban shim.