CHINA, Jymmang 11: Ka jingangnud jong ka India ban rung sha ka FIFA World Cup ka la kut noh ha ka sngi Nyngkong hadien ba ka la shah rem noh ha ka China da 0-3 kol ha ka jingïakhun Quarterfinal jong ka AFC Under-17 Women’s Asian Cup 2026 ha China.
Kane kadei ka sien ba nyngkong ba ka India kan rung sha ka Quarterfinal ha kane ka lympung. Ka jingjop kan jin da la pynthikna ïa ka jaka jong ki ha ka lympung FIFA U-17 Women’s World Cup, kaba la buh ban pynlong kham hadien mynta u snem ha Morocco. Hynrei ha ka jingïalehkai, ka paw shai ba ka China ka kham khlaiñ haba nujor bad ki thei ïalehkai ka India.
Ka Huang Qinyi (38’), ka Liu Yuxi (45+4’ Pen), bad ka Li Qixian (90’) ki la pynkhihjar na ka bynta ka China ban jam shakhmat sha ka semifinal, ha kaba kin aireng pyrshah ïa ka North Korea kaba la pynjemkhnap ïa ka Thailand da 6-0 kol ha kawei pat ka jingïakhun Quarter final.
Kham mynshwa ha kane ka lympung, ka India ka la pynliem ïa ka Lebanon da 4-0 kol ha ka jingïalehkai ba khatduh jong ka ha ka group stage — ka jingjop kaba nyngkong eh jong ka kynhun ha kane ka lympung hadien 21 snem.
Na ka bynta kane ka jingïalehkai ka Head coach ka Pamela Conti ka la wanrah tang kawei ka jingkylla ïa ka kynhun ba sdang kaba la pynliem ïa ka Lebanon ha ka jingïakhun group-stage ba khatduh, da kaba wanrah ïa ka Joya ha jaka jong ka Anushka Kumari.
Napdeng ki arngut ki thei ïalehkai ka jylla Meghalaya – tang ka Bonifilia Shullai kaba la ïohlad ban mih madan ha kane ka jingïakhun Quarter final. Ka Bonifilia ka la mih na ben shong ha ka minit kaba 65 ha jaka jong ka Thandamoni Baskey.
Ki thei ïalehkai ka India U17 kiba la mih madan ha ka QF: Munni (GK), Elizabed Lakra, Divyani Linda (C), Thandamoni Baskey (Bonifilia Shullai 65′), Julan Nongmaithem (Olivia Chanu Ningthoujam 46′), Ritu Badaik, Pritika Barman (Anushka Kumari 79′), Redima Devi Chingkhamayum, Abhista Basnett, Alva Devi Senjam, Joya (Anwita Raghuraman 65′).
