MSL 5: Rung QF ka Mawlai, Rangdajied, Nangkiew Irat, Lajong, Nongkseh, Maram FC bad ka Rymbai Shkenshynriah

Shillong, Jymmang 11: Baroh san tylli ki klob ba khlaiñbor jong ka nongbah Shillong – ka Mawlai SC kaba bat ïa ka nam lahduh, ka Shillong Lajong FC, ka Nongkseh SSCC, ka Nangkiew Irat SC bad ka Rangdajied United FC ki la jop ïa la ki jong ki jong ki jingïalehkai Round-16 ha ka lympung 5th Meghalaya State League hynne ka sngi Nyngkong. Ka Maram FC na West Garo Hills bad ka Rymbai Shkenshynriah jong ka East Jaintia Hills kidei ki ar tylli kiwei pat ki kynhun kiba la ïasoh lang ban jam sha ka wat ïakhun kaba bud.
Hynrei ka jingïakhun kaba la buh ha Mairang hapdeng ka Langsning FC pyrshah ïa ka Lumphyrnai Sohphoh FC, la hap ban pynsangeh noh namar ka jingsniew ka madan kaba la shah ktah na kadaw ka jingjur palat u slap. Ïa kane ka jingïakhun yn pynkynriah noh sha Shillong ha SSA Stadium bad kan long ha kane ka sngi Ba-ar ha ka por 6:45 baje janmiet.
Ka jingïakhun kaba nyngkong hynne ka sngi ka la long ha madan First Ground SSA Stadium ha kaba ka lahduh jong ka Group B ka Nangkiew Irat ka la lah ba kan pynliem noh ïa ka Khimusniang SC kaba wan baar ha ka Group A da 2-1 kol.
U Neblejohn Lyngkhoi u la pynkhih ïa ka kol kaba itynnad ha ka minit kaba 31 bad ka Nangkiew Irat ka la pynjlan ar shah ïa ka kol lamkhmat shuwa ban jam sha ka por shongthait lyngba u Nikelson Bina (44′). Shuwa ban jia kane ka kol ka Khimusniang ka la shah pynduna sha ka 10 ngut hadien ba u Luckyness Khyriem u la shah sei beit beit da ka red card hadien ba u la pynur ïa u Dibinroy Nongspung.
Ki la don shuh shuh ki khyllipmat kiba pynkhie im ïa ka jingïakhun ha ka kylla miet ha ka por ba ka Khimusniang ka la ïoh ïa ka penalty. ïa kane ka penalty la shah khanglad da u nongap kol jong ka Nangkiew Irat u Emerald Dan hynrei u Dawanbiangmi Passah (63’) u la peitngor ïa ka lad ban ïoh biang ïa ka kol bad u la thep ïa ka da kaba suk.
Ki la don shuh kiwei pat ki lad na ka bynta kane ka klob kaba na Jowai hynrei ka bok kam shym la don ha ka liang jong ki bad ki la khyllem noh na kane ka lympung hadien ba ki la ïakhun tyngeh bad aiti lut ha madan.
Ha Amlarem, ka Mawlai kaba bat ïa ka nam lahduh, ka la wanphai biang sha ka kyrdan ïalehkai kaba khlaiñ da kaba pynjemkhnap haduh 11-0 kol ïa ka Thangskai Tiger SC. Ka la don ka jingkhmihlynti kaba khraw ba kan long ka jingïakhun kaba ïakhaid bha namar ba ka Thangskai kaba wan ba-ar ha ka Group D ka dei ka kynhun kaba shyrkhei bha na East Jaiñtia Hills hynrei kam shym la lah satia ban ïoh ïa ka jingsynshar pyrshah ïa ka kynhun ba la jop ha ka Group C.
U Robertson Khongriah (13′, 18′, 32′) u la thep hat trick, nangta Wadshwa Latoo (56′, 81′) bad u Jestibor Mawlong (83′, 88′) ki la pynkhihjar mar ar sien, katba u Samlang Rympei (28′), u Fairming Suting (45’+1), u Kevin Rymbai (57′) bad u Basuklang Bina (59′) ki la bynrap mar shi kol. Kane ka dei ka sien kaba nyngkong ba ka Mawlai kan ïalehkai ha ka jingkhlaiñ ba pura naduh ba ka la wanphai na ka lympung I-League 3 ha Manipur.
Ha kawei pat ka liang, ka Shkenshynriah (lahduh jong ka Group D) ka la lah ba kan pynliem noh ïa ka Amlarem SC (runners-up jong ka Group C) da 2-0 ha ka jingïakhun kaba la long ha Khliehriat. Baroh ar tylli ki kol jong Shkenshynriah, kaba la poi sha ka semifinalist ha ka MSL 4, la thep da u Hesmiki Rymbai (7′, 26′).
Kawei pat ka jingïakhun kaba la khmih lynti ba kan long kaba ïakhaid bha ka dei hapdeng ka Janepih YSCA pyrshah ïa ka Rangdajied ha Williamnagar. Ka Rangdajied kaba dei ka lahduh jong ka MSL ha u snem 2023, ka la jam sha ka Round-16 da kaba wan ba-ar ha ka Group H, katba ka Janepih ka la synshar ïa ka Group G.
Hynrei ha ka por kaba kongsan tam ka Rangdajied ka la lah ban wanrah ïa ka jingïalehkai kaba kyrpang, watla ki la shah pynbor ban jam sha ka Extra time da ka Janepih shwa ban jop da 3-1 kol. U Mebannangkiew Thabah (30’) u la pynkhihjar nyngkong na ka bynta ka RUFC bad la paw kumba kan pynneh pynsah ïa ka jinglamkhmat kaba tang 1-0 kol ha baroh shilynter ka jingïalehkai tad haduh ba u Edyson Iawphniaw un pynïakhaid ha ka minit kaba 90. Ka Rangdajied ka la lah ban pynskhem ïa ka jingjop da kaba thep sa artylli ki kol lyngba u Ricky Mawlong (98′) bad u Elnathan D Wahlang (107′).
Nangta ka Shillong Lajong FC, lahduh jong u snem 2019, ka la wanrah sa kawei pat ka jingïalehkai kaba khlaiñ ban pynkhyllem noh ïa ka Mishon SSCC (runners-up Group F) da kaba jop 5-0 kol ha Wahiajer. Ka Lajong, kaba lamkhmat ha khlieh duh ha ka Group E, ka la jam shakhmat lyngba ka hat trick jong u Fridison Wanniang (57’, 81’, 86’), u Deibormame Tongper (45’+2) bad ka kol ba la kum thep hi da ka liang pyrshah ha ka minit kaba 75. Kane ka dei ka sien kaba lai ba ka Lajong kan jop da 5-0 ha kane ka samoi bad ka la shah thep tang shi kol ha ki hynñiew sien ïakhun.
Ha Mawkyrwat, ka Maram FC, ka kynhun kaba sah marwei na Garo Hills ha kane ka lympung, ka la pynliem ïa ka Seng Samla Umdang Pyllun da 1-0 lyngba ka kol ba la thep da u Tremarchwal Ch Marak ha ka minit kaba 68. Ka Maram ka la pyndep kyrdan ba ar ha ka Group G, katba ka Umdang Pyllun ka la wan ha khlieh duh ha ka Group H.
Ka jingïakhun ba khatduh jong kane ka sngi ka long ha ka por janmiet hapdeng ka lahduh jong ka Group A ka Nongkseh SSCC bad ka Mawphu SC kaba la wan baar ha ka Group B. Ka Nongkseh ka la pynskhem ïa ka jingjop lyngba ki kol jong u Hardy Cliff Nongbri (36′, 66′), u Shano Tariang (45’+8) bad u Chesterpaul Lyngdoh (64′).