Pynkup burom ka kur Marweiñ ïa ki samla ba wan shakhmat ha ka final exam jong u snem 2022-23

Nongstoiñ K’lyngkot 03: Kum shibynta ban pynshlur ïa ki khun ki kti bad ki samla napoh ka kur ka jait Marweiñ kiba dei na ka kpoh jong ka Ïaw Nah Pah kaba shong ba sah ha ka shnong Mawlangwir South West Khasi Hills ka la pynlong ïa ka Dorbar kur kaba shi sien lai snem ha ka shnong Nonglang West Khasi hills ka 30 tarik u bnai Nohprah ba la dep.
Ha katei ka dorbar kur palat laispah ngut shynrang bad kynthei na ki lai tylli ki unit ka Mawlangwir , Nonglang bad Mawkapiah units ki la ïapoi .Ka dorbar ku ka la long kaba shongkun bha ha kaba baroh ki nongkitkam bad ki dkhot jong ka Excecutive Committee ba kynthup ïa ki Kñi rangbah bad ki longkmie bad ki nongwan shonghkha ki la ïapoi baroh.
Ha shuwa ban sdang ïa ka dorbar la pdiang burom ïa baroh kiba wan na kitei ki lai tylli ki unit da ka unit Mawkapiah ha ryngkat ka jingrwai ïa ka theme song jong ka kur Marweiñ kpoh Ïawnah Pah.Ïa katei ka dorbar la pynïaid da u Kñi rangbah jong ka kur u bah R.Prowell Marweiñ uba dei ruh u president bad ha kajuh ka por u secretary jong ka kur u kñi rangbah u bah T.Roy Marweiñ u la pule ïa ki kyrteng jong ki rangbah kur, ki kmie tymmen bad kiba wan shongkha kiba la khlad noh ha u snem 2022-23 bad la pynlong ïa ka jing sngap jar kaba shi minit kum ka dak ka jingkynmaw burom ïa ki.
Ha kaba sdang eh jong ka dorbar la pule ïa ka report jong ka jingtrei kam bad ki jingïakut jong ka Excecutive Committee kiba la long ha kine ki lai snem kiba la dep da u bah T.Roy Marweiñ secretary bad ha kajuh ka por la pynsgew ïa ka audit report ïa ka jingdon jong ka fund kur da u bah Teiminot Marweiñ Auditor.
Nalor kata na ka liang u secretary u la pynsgew ruh ïa ka report jong ki khun kiba hiar pateng na ka Pah Marweiñ bad na ka kpor jong ka Pah ki don saw kynthei ka Larpah Marweiñ , ka Pharpah Marweiñ, ka Ñaipah Marweiñ bad ka Nabi Marweiñ.
Kat kum katei ka report la ong ba ki khun ki ksiew pateng jong kitei ki saw kynthei ki la roi parum pareh bad ki don kiba dang shong ha Mawlangwir, kiba la shong la sah ha Nonglang bad Mawkapiah bad ki dei ruh kiba la leit buahi shnong nyngkong nyngshap bad ha kine ki sngi ki jait Marweiñ ki dei kiba la bun pait tam bad kiba la kiew shaphrang ha baroh ki liang ha Nonglang bad Mawkapiah.Ha katei ka sngi u President u la pyllait ruh ïa ka history jong ka kur Marweiñ kpoh Ïawnah Pah Marweiñ kaba la thoh da u bah T.Roy Marweiñ uba dei ruh u secretary jong ka kur .
Ha katei ka sngi la ïoh ïa ka drama kaba la pynkhreh da ka Mawlangwir bad khatduh eh la sam ïa ki Momento kum ka dak jong ka jingpynkup burom sha ki arphew ngut ki samla napoh ka kur ba kynthup ïa i Miss. Sicilica Marweiñ, Miss .Deicy Mery Marweiñ, Miss .Banrikynti Marweiñ, Mr. Daniel Marweiñ, Miss. Lidity Marweiñ, Miss. Millinium Grace Marweiñ, Miss. Airisha Marweiñ, Mr. Pherbirthstarson Marweiñ, Miss .Lapynshongdor Marweiñ ,Mr . Rangkyntiew Marweiñ, Miss Bonybell Marweiñ,Miss Ibanbianglin Marweiñ, Miss Clarity Marweiñ,Miss. Nazareen Marweiñ, Miss. Prestica Marweiñ, Miss Banrilin Marweiñ, ,Miss Pynwandorlin Marweiñ, Miss Jenica Marweiñ bad Mr. Vigilson Marweiñ.Kitei ki samla ki dei kiba la wan shakhmat ha ki final Exam jong ka MBOSE jong u snem 2022 – 23 ba kynthup ïa ka Secondary School Leaving Certificate, Higher Secondary School Leaving Certificate, Graduate , Degree, Engineering , Doctor, Nursing , Automobile Engineering bad kiwei kiwei.