Ka Meghalaya mynta ka la dei kawei na ki jylla kaba la paw bha ha khmat ha ka jingïakhun pyrshah ïa ki jingdih buaid da kaba buh hakhmat eh ïa u drok da ka jinglah ban pyntreikam ïa bun ki kyndon ain bad ruh ki jingpynsaja na ka bynta kito kiba don bynta ha ki kam khaïi beaiñ bad ban pyngop ïa ki khynnah rit bad kumjuh ïa ki samla ba dang lui lui tang na ka daw ban heh ka kamai bad ban rben ka pla jong ki. Hynrei ha kawei pat ka liang ki bor sorkar khamtam ki tnad ba dei ban ïakhun pyrshah ïa ki jingdih beain ki sdang ban klet imat ba donkam ruh ban ïakhun pyrshah wat ïa ka jingdih duma ne sikret pathar ha ki jaka paidbah kaba la long kynrei bad i saitmet haduh katta katta.
Lada kren ïa kane ka bynta lah ban ong ba katto katne ka jingdih duma ne sikret ha ki kali kamai ka la sdang ban duna hynrei ka jingdih pat ha ki jaka paidbah i kumba ka nang jur nang jur pynban. Khlem da leit jngai, leit tang ha ki bynta jong ka Motphran lane ha Khyndailad phin ïohi kyrhai bad kynrei bha ka jingdih duma pathar khlem da khein shuh ïa ki khunlung khynnah kiba ïaid ba ieng ne thied jingthied ha ki dukan. Kane ka jingmlien ka long paidbah bad i kumba ka synshar lang ïa baroh khlem da khein ïa ki nongsor ne nongkyndong, kiba la nang la stad ne kiba khlem leit skul hynrei ka paw kumba ka bor pyrkhat na ka bynta kiwei kam don shuh tangba la ïoh ban kynpum bad pynhun ïalade.
Ha kawei ka liang, kum ka sorkar ka la dei ban peit lem halor kane ka bynta namar ka nuksa bym itynnad kaba kine ki briew ki pyni ka pynphalang pat da kumwei ïa ka jingmut jingpyrkhat kaba dang tlot jong ki heprit khamtam ki khynnah skul kiba ïaid lyngba na kine ki jaka la ka long naduh ka por mynstep haduh ka por janmiet.
Haduh mynta hi khamtam ha Meghalaya kam pher la kadei ha ki jaka sor lane ha ki nongkyndong lada kren ïa ka jingbam ne jingdih duma kadei ka mat kaba baroh kim sngew tynnad ban ïohsngew khamtam lei lei lada ong ba ka wallam bun ki jingpang. Lah ruh ban ong ba katno ngut eh ki kpa lane ki kñi kiban patiaw ïa ka jingïaid rally ki khun ki pyrsa haba ka jingkyrni ka la kylla thit. Kawei pat ka bynta lada ngam jylliew bha ka long ba ka jylla Meghalaya ka dang bun bha ki jingïakhun lada ka kwah shisha ban ïakhun pyrshah ïa ka jingdih bad jingbam duma. Kane ka hap ban sdang shwa na ki iing ki sem ha shwa ba kan treikam ha ka imlang sahlang ha ki shnong ki thaw bad ha ka thaiñ hi baroh kawei.
Sngew dei ruh ban ong ba ki skul nalor ba ki pynlong ïa ki jingïaid rally ban pyrshah duma ki dei ruh ban khot ïa ki kmie ki kpa ban ai jinghikai lane ban syllok ïa ki halor ki jingma kiba utei u kynja jingbam jingdih u ktah ïa ki bad ruh ïa ki khun ki kti bad ïa baroh kiba ïa tan pateng ïa ka tdem kaba mih na u. Na ka por sha ka por la ju ïohsngew ba wat ka tdem kaba mih na ki nongdih ka ktah ïa kiba ring kumta lada pynshai ïa kito ki snar dih duma la dei ban ong ba ki dei ban sngewthuh bad pyrkhat bun bun sien ïa ki khun ba kam pat biang ban ong ba ieid ïa ki khun da kaba pyndap pynbiang ïa ka bam ka dih ka kup ka sem lane buh skul hynrei ruh ban peit ba ka jingim jong ki ha ka dih ka bam kam dei ban ïa bit ne ktah ïa ki khun ne ïa ka kurim kaba don ha syndah man ka sngi.
Ha kane ka juk mynta imat bun kim salia than shuh ïa ka jingkoit jingkhiah nalor ba ki jingbam kim long kiba paka shuh, pynban ki briew ki dang bam ïa kiwei pat ki jingbam kiba sniew kum kaba dih duma bad bam ïa ki khaini, bad kiwei. Man ka por ba ki leit ban shah sumar ne ïakynduh ïa ki doktor ba ju batai ba ka jingkyrni ka jingdih sikret ne duma bad ka jingbam duma ki long kiba sniew bad kiba ktah ïa ka koit ka khiah, hynrei kane kam shym la pynphikir satia ïa ki paidbah. Ka jingkoit jingkhiah ka don ha ka kti jong u briew shimet shimet ban phikir ïa la ka jong ka jingim, palat nangta ka shong ha ka bor jong ka mariang.
Ha ka por jong ka jinglong samla ha ba ka bor met ka dang biang bad ba ka bor jong ka jingïaleh pyrshah ïa ka jingpang ka dang khlaiñ, kam da don jingktah than eh ïa ka koit ka khiah, hynrei wat la katta ruh bun ki samla ki ud bad ki mad shibun ki jait jingpang. Na ka bynta kito kiba dei ban kiar ïa ki jingbam kiba ktah ïa ka met jong ki, ka jingbam kam ïapher satia na ka kyiad bad na u drok namar ba ka pyntroin ïa ka met jong ki. Tang kawei ka buit kaba rieh ba kito kiba ngat ha kitei ki jait jingpang ka long ba kin sngewthuh shai kdar ïa ka jingmut jong ka jingim bad ka jingbam. Haba kum bam ïa ka jingbam kaba ktah ka jingbang ka neh tang da ki minit bad ka jngbabe ka tied man la ka khyllip mat bad ka jingkoit jingkhiah ka nanghiar nanghiar.
