Isynei ïa ki nong Lapangngap haba ka Sorkar kam lah ban shim khia, dang donbor pynban ka KAAC

Ha ka jingïakren ïa kane ka mat ha Lapangap, la sngew kyndit thret, haba u myntri ka sorkar jylla, ula ïathuh ba ka Karbi District Council, ka ju kylla ktien na ka por sha ka por, halor ka jing ïa pynbeit ïa ka jaka rep jong ki Pnar ha katei ka jaka.
Ka jingkren u myntri, ka la paw shai kdar, ba haduh katno ka jingkhlaiñ bor jong ka Karbi Anglong District Council, ha kaba ka sorkar Assam ruh kam don bor eiei ruh em ban ïa tuklar ïa u pud u sam ha katei ka thaiñ, kaba ki khot ka Sixth Schedule area.
Na ka jingkren jong u ma Wailad Shylla, Myntri ka sorkar jylla, ka la paw shai, ba ka jingïakren ïa ka Lapangap, kam dei shuh tang bad ka sorkar Assam, hynrei mynta ka dei ruh bad ka Karbi Anglong District Council bad haba ka long kumta, kam dei satia kaba suk ban ïakren hapdeng ki ar tylli ki bor, kiba don ïa la ki jong ki jingmut bapher bapher, halor katei ka mat jong u pud u sam bad lada ka long ha kane ka dur, ka kdew shai, ba ki District Council ka Meghalaya, kim ler eiei ruh em, ha khmat ki District Council jong ka Assam, namar ba ki District Council jong ka Meghalaya, ki dei kiba shu shon kti bad ki niangkohnguh, ha kaba ka sorkar jylla, ka nion katba mon, ha ka jingshim jaka, na bynta ki karkhana, na bynta ki kam pynbeit pud, na bynta ki jingtei ia ki surok bad ki iing sorkar; katba ha Karbi Anglong, wat ia ka jaka jong ki pnar, ka Council ki Karbi, ka dang lah ban khanglad haduh katne.
Ka jingkren jong u myntri ka sorkar jylla, ka la shai kdar ha kane ka kynti, ba kato ka jing ia pynbeit pud hapdeng ka sorkar Assam bad ka sorkar Meghalaya, kan nym treikam satia haei haei ruh, namar ba ka Assam, ka lah ban iakren pud tang ha ki jaka sorkar lane ba ki ong revenue land, katba kam lah satia ban iakren ha ki jaka kiba hap ha ki Sixth Schedule area.
Lada ka long kumta ka pyni shai, ba haduh katno ka sorkar MDA, ka la leh kput ïa ka Khasi District Council bad ka Jaiñtia District Council, da kaba ka shu kurup jubor ïa ki jaka, kiba hap ha ki Schedule area, ban leit die duh sha ka sorkar Assam, katba ha kawei pat ka liang, ka Assam, kam nud satia ban ang, wat tang shi kyntien, ha kaba ïadei bad ki jaka ba la kam trai da ka Karbi Anglong District Council (KAAC), hynrei ka ai jingïada ruh, ban pynkhlaiñ ïa ka bor jong katei ka Council, ba kan ïada ïa la u jong u pud u sam bad ïa la ki jong ki jaka ki puta jong ka.
Ki ar tylli ki Council jong ka KHADC & ka JHADC, ki la shu long tang ki nongpeit jawdud narud, ïa ka jingïakren kaba la dep ïaid shakhmat ha ki 6 tylli ki jaka, ba la ñion da ka jubor justi, ha ka jingkwah palat jong U Conrad Sangma, ban ïa pynbeit pud bad ka Assam bad ban ai ei haduh 19 square kilometre sha katei ka jylla.
Haba phai sha kane ka jaka la isynei shisha naba ym don satia kiba kwah ban shim khia imat la I kumba kane ka shnong kam hap shuh hapoh u pud u sam jong ka jylla Meghalaya ban da dei ba ka dang hap la dei na ka liang ka JHADC bad ka sorkar jylla ba kan shim ia ki lad ki lynti ban ïakren bad ka sorkar Assam bad kumjuh ruh ïa ki bor ka KAAC ba kim dei ban tuklar ïa kane ka jaka kaba la mih ki jingeh na ka por sha ka por.
Donkam ruh ïa ka sorkar jylla ba kan pynkhlaiñ ïa ki bor ai jingïada ba kin leh ïa ka kam kaba kongsan halor kane ka bynta khnang ba ki paidbah kin ïoh ïa ki bor jingshngaiñ kumba ki dei ban ïoh. La ïohi ruh ba ha kine ki sngi la donkam ïa ki bor ba dei peit ba kin shim khia halor kane ka jingeh khnang ba ki nongshong shnong kin ïoh ki jingshngaiñ bad ban lait na ki jingshah pynthut na ka por sha ka por bad donkam ruh ïa ki bor jong ka aiñ ba kin shim khia ha kaba ïadei bad kane ka kam kaba la sah teng naduh ki snem kiba mynshwa.
Shuh shuh ha kaba ïadei bad kane ka bynta la ïohi ruh ba kiba bun na ki sengbhalang ki la shim khia ha kaba ïadei bad kane ka kam hynrei ha kajuh ka por ki la don ruh kiba shim kabu halor kane ka jingjia bad kumta donkam ka jingïatreilang ban pynneh ïa ka shongsuk shong saiñ ha kane ka shnong kaba la donkam na ka por sha ka por.
Ha kaba ïadei bad kane la donkam ruh ïa ka sorkar ba kan pynlong noh ka jingïakren khnang ba ki paidbah kiba sah sha kane ka thaiñ kin ym mad ïa ki jingeh na ka por sha ka por bad kumjuh ruh ba ki kynhun shim kabu kin ym ïoh ka lad ban pyndik ïa ki paidbah kiba sah sha kane ka thaiñ na ka por sha ka por.