Shillong, Jymmang 24: Ka Langsning FC ka la pynthikna ïa ka jaka ha ka semifinal na ka Group B ha ka 5th Meghalaya State League da kaba pynliem noh ïa ka Rymbai Shkenshynriah SC da 4-2 kol ha ka Quarterfinal League Stage ha ka sngi Saitjaiñ.
Ha kane ka jingïakhun ka Langsning ka la hap ban ïalehkai pyndep da tang 10 ngut ha madan hadien ba ïoh red card u Dajiedlang Wanshnong ha ka kylla miet.
U Atlanson Kharmaw (32′), u Samuel Phawa (41′), u Dajiedlang Wanshnong (70′) bad u Mecheal Roy Kurbah (90’+2) ki la pynkhihjar na ka bynta ka Langsning, katba ki ar kol jong ka Shkenshynriah la thep da u Iaishah Bareh (48′) bad u Harita Suchen (90’+5).
Ka jingshah pynduna rangïalehkai kam shym la don jingktah eiei ïa ka Langsning namar ka kynhun na East Jaiñtia Hills kam shym la lah ban pyndonkam hok ïa ka kabu ba ka la ïoh, watla ki dang don sa artylli ki kol ha ki minit pynjlan ba khatduh hadien ka red card jong u Dajiedlang, lyngba u Mecheal na ka bynta ka Langsning bad u Harita na ka bynta ka Shkenshynriah.
Ha ka jingïakhun kaba kham hashwa, ka Nangkiew Irat SC ka la pyndep ïa kaei kaba ka dei ban leh ban pynneh pynsah ïa ka jingkyrmen ban ïohrung sha ka semifinal da kaba pynliem noh ïa ka Maram FC da 3-1 kol.
Ki lai kol jong ka Nangkiew Irat ki la wan lyngba u Justerwell Tham (28’, 59’) uba la pynkhihjar ar sien ryngkat bad ka shi kol jong u Neblejohn Lyngkhoi (82’). Ka Maram ka la pynphai shi kol lyngba u Threesbirth Momin (86’).
Haba phai sha ka miej, ka Langsning ka lamkhmat da 12 poiñ bad ka la thikna ban long kawei na ki ar tylli ki kynhun ban pyndep ha ka thup kyrdan ba ha khlieh duh lane Top 2. Ka Shkenshynriah bad ka Nangkiew Irat ki ïakhaid mar 9 poiñ hynrei ka Shkenshynriah ka wan hakhmat namar ka don ïa ka rekod jingjop pyrshah ïa ka Nangkiew (head to head). Kumta ka jingïakhun hapdeng jong ki lashai ka sngi Ba-ar kan rai mano ban jam shakhmat sha ka semifinal. Katba ka Maram pat ka wan sha trai duh khlem da kamai poiñ (0).
Ha kane ka sngi Nyngkong kan dei ka wat kaba khatduh jong ki jingïalehkai Quarterfinal jong ka Group A. Ha ka por 2 baje mynsngi ka Rangdajied United FC kan aireng pyrshah ïa ka Shillong Lajong FC bad ha ka por 6 baje janmiet ka Mawlai SC kan aireng ïa ka Nongkseh SSCC.
Watla ka Lajong bad ka Nongkseh ki la dep ban pynthikna ïa la ka jong ka jaka ha ka semifinal, hynrei kine ki jingïakhun kin sa pynthikna mano napdeng kine kin wan ha khlieh duh jong ka Group A bad mano ba wan ha ka kyrdan ba-ar.
