SUZHOU, CHINA, Jymmang 08: Ki thei ïalehkai phutbol U17 jong ka ri India ki la thaw histori da kaba rung Quarter Final ha ka lympung AFC U17 Women’s Asian Cup China 2026 hadien ba ki la pynliem noh da 4-0 kol ïa ka Lebanon ha ka jingïalehkai ba khatduh jong ki ha ka Group B ha Suzhou Taihu Football Sports Centre Pitch 8 hynne ka sngi Thohdieng, 08 tarik u Jymmang, 2026.
Ka Pritika Barman (7 & 85’min) ka la pynkhihjar ar sien ha kane ka jingïalehkai, katba ka Alva Devi Senjam (36’min) bad ka Joya (72’min) ki la thep mar kawei ha kaba ka India ka la khur ïa ka jingjop kaba nyngkong ha ka AFC U17 Women’s Asian Cup naduh u snem 2005.
Kane ka jingjop kaba khraw ka la pynskhem ïa ka India ban rung Quarter-final kum kawei na ki ar tylli ki kynhun ba kynsai tam kiba pyndep ha ka kyrdan kaba lai (best third-placed team).
Kane ka dei ka sien kaba nyngkong eh ba ka India kan rung sha ka wat ïakhun knockout stage jong kane ka lympung bad ka dei ruh ka sien ba nyngkong eh jong ka India ban poi sha ka quarterfinal ha kino kino ki lympung Asian Cup naduh ka Men’s AFC U16 Championship ha u snem 2018. Ha ka phutbol jong ki kynthei, ka dei ka sien kaba nyngkong ba ka ri kan rung sha ka wat ïakhun knockout stage jong ka Asian Cup naduh ka por jong ka U-19 Women’s Championship ha u snem 2004.
Napdeng ki ar ngut ki thei ïalehkai ka jylla Meghalaya, tang ka Bonifilia Shullai kaba la ïoh ïa ka lad ban mih madan na ben shong ha ka kylla miet. Ka Bonifilia ka la mih bujli ha ka minit kaba 75 ha ka jaka jong ka Thandamoni Baskey.
Ha ka Quarter-final, ka India kan aireng pyrshah ïa ka China, kaba ïalam hakhmat duh ïa ka Group A da 9 point, ha Suzhou Sports Centre Stadium ha ka sngi Nyngkong, ka 11 tarik Jymmang, ha ka por 5 baje janmiet. ïa kane ka jingïakhun yn pyni live ha ka AFC Asian Cup YouTube Channel.
Ka India ka la rung sha ka Quarter final kum kawei na ki ar tylli ki kynhun ba kynsai tam kiba pyndep ha ka kyrdan kaba lai (best third-placed team) ryngkat ka Thailand. Ka India ka la pyndep ïa ki jingïalehkai group stage da kaba kamai lai point bad ka jingïapher kol kaba -1, kaba kham heh haba nujor bad ka Philippines’ -13 ha ka Group C.
Ka jingjop ha ka Quarter-final kan pynthikna ïa ka jingïoh rung sha ka FIFA U17 Women’s World Cup 2026 ha Morocco, kaban dei ka jingïoh rung kaba nyngkong eh jong ka kynhun India (shynrang ne kynthei) ha ka FIFA World Cup katkum ka jinglah ban ïalehkai.
Ki thei ïalehkai U17 jong ka India kiba la mih madan ha ka jingïalehkai ba khatduh ki long: Munni (GK), Elizabed Lakra (C) (Alena Devi Sarangthem 85′), Divyani Linda, Thandamoni Baskey (Bonifilia Shullai 75′), Julan Nongmaithem (Joya 58′), Anushka Kumari (Olivia Chanu Ningthoujam 75′), Ritu Badaik, Pritika Barman, Redima Devi Chingkhamayum, Abhista Basnett, Alva Devi Senjam (Pearl Fernandes 75′).
