Shillong, Rymphang 08 : U Jaskirat Singh Sachdeva rangtied bol ka Meghalaya u la thaw history ha ka jingïalehkai paralok pyrshah ïa ka Odisha ha ka jingïalehkai kaba lai sngi jong ka lympung ïalehkai U-25 Col CK Nayudu Trophy ha ka sngi Ba-ar da kaba khyrwit ïa ka sentury, ha ka jingrem noh jong ka kynhun.
U Jaskirat Singh Sachdeva ha kane ka jingïalehkai u la ïoh ban khur ïa ka khusnam Player of the Match hadien ba u la kamai 74 ron (not out) ha ka inning kaba nyngkong bad khyrwit 100 ron ha ka inning kaba ar ha kaba ka Meghalaya ka la kamai 204 ron.
Ka Meghalaya ka kham duna ha ka jingkamai ron haba bteng biang ïa ka inning kaba ar da 12/3 wicket, bad ka donkam sa 119 ron ba ka Odisha kan tied biang hadien ba ka la kamai 201 ron ha ka inning kaba nyngkong ba la shah pynkhyllem lut baroh ki wicket. Ka Odisha kaba la beh ïa katei ka ron ka la kamai 332 ron.
Ka ha ka jingkamai 22 ron ka la duh noh haduh 5 wicket, hynrei u Swastic Chettri uba la pyrshang ban kamai ron lyngba ka jingïarap u Sachdeva ki la buh 82 ron ha ka jingduh noh ïa ki san wicket shwa ba u Chettri un shah pynhap wicket lyngba ka run out, u la khyrwit saw tylli ki four bad kawei ka six.
Ka Meghalaya ka la shah pynkhyllem noh 8 wicket ha ka jingïoh kamai 138 ron ha kaba u Sachdeva u la khyrwit haduh 12 tylli ki four bad u Ram Gurung uba tied lang u kamai 29 ron bad kamai ron lang da 65 ron.
Ka Meghalaya ka la kamai 204 ron ha ka inning kaba ar ha kaba ka Odisha ka donkam da 74 ron ban jop bad kaba la lah ruh ban pyndep ïa katei ka thong ha ki 19.4 over.
Kiba la khur wicket na ka bynta ka Meghalaya ki kynthup u PM Santhosh (1/15) bad u Manish Sharma (1/33), pynban watla katta ruh ka Odisha ka la lah ban pyndep ban beh ïa katei ka thong.
Ka Meghalaya kan pynkhreh pat ban ïakhun kaba khatduh ha katei ka lympung pyrshah ïa ka Vidarbha naduh ka 12 tarik Rymphang.
