Bthah ka MSOA ïa ki nongïalehkai ba shah jied ha ka Talent Identification ban leit mih sha ki ophis DSO

Shillong, Rymphang 08 : Ka Meghalaya State Olympic Association (MSOA) ka la bthah ïa kito ki nongïalehkai kiba la shah jied ha ka Talent Identification ba kin leit ban mih sha ki ophis u District Sports Officer (DSO) ha la ki jong ki District lane sha ka ophis jong ka MSOA ha J. N Stadium, Shillong.
Ka Meghalaya State Olympic Association ka la ïoh ban pynlong ïa ka prokram wad khynnah donsap kaba la tip kum ka “State Sports Talent Identification Program 2022” ba la pynlong hapoh ka STAR Program jong ka Phase- I bad Phase-II ha u Naitung 2022.
Ïa katei ka prokram ba la pynlong ha ryngkat ka jingïatreilang bad ka Directorate of Sports & Youth Affairs, Meghalaya, Shillong ha baroh ki District jong ka jylla Meghalaya kiba la don 200 ngut ki nongïashim bynta na ka Phase-I bad 60 ngut na ka Phase- II bad kiba la shah jied ban don bynta ha ka jingkilan met (Training) ka ban long shi snem. Bad la kyntu ba kin leit mih sha ka ophis ban tip kham bniah naduh ka 8 tarik haduh ka 14 tarik Rymphang 2023.