Ka jingsei briew jong ki kyrtong kiba ïakhun ïa ka elekshon naduh ka sngi thep kyrteng haduh ka sngi bishar kyrteng ka la long kaba i shyrkhei ban peit namar ka jingkhapngiah ki surok ki la pynjynjar haduh katta katta ïa ki paidbah nongleit nongwan. Haba peit na ka jingmih jong ki paidbah ban ieh ïa la ki jong ki kam ki duk ban pyni ïa ka jingieid ïa la ki jong ki kyrtong ka la long ka tamasa kaba i thamula ban peit. Toi, shisien manla ka san snem, haba la poi ka samoi jied syiem ka ju long hi ka tamasa kaba u paidbah u kmen, u ieh la ki kam ki jam bad u kmen ba la ïoh bai sngi san spah tyngka na ki kyrtong ban leit risa, ban kynhoi, ban leit shad sadhai khlem pyrwa. Kane ka tamasa elekshon kaba ju neh tang shiphang por ka ju pynlamwir kumba ai jadu ban pynbiej ïa ka jingmut jingpyrkhat jong ki paidbah.
Ka jingpyni paid jong ki kyrtong ka long namarba ki syier mynsiem hor hor ïa ki kyrtong kiba kham khlaiñ khamtam ïa ki Sitting MLA.
Haba peit ïa ka rukom leh shongshit jong ki paidbah ha kane ka tamasa ka la pynsyrtok ïa ki nongleit nongwan khamtam ïa ki khynnah skul kiba dang pule Class-X kiba hap ban leit thoh eksamin Pre-Board ban pynkhreh ïa ka eksamin SSLC mynta u snem. Ym tang katta, ka jingdheng kali kaba jur ym tang ha nongbah Shillong hynrei wat ha Jowai, ha Nongpoh bad ha kiwei kiwei ki jaka kiba la pynsyrtok wat ïa ki kali kit nongpang kiba kit ïa kiba pang ba shitom sha ki jaka ai jingsumar.
Naduh ka sngi nyngkong ba la sdang ka jingthep kyrteng da ki spah bad ki phew spah ngut ki nongkyrshan jong ki kyrtong ki tuid sha ophis treikam jong ki Deputy Commissioner ban synran ïa ki kyrtong bad ka jingïathyngngian parabriew ka la long shaba palat liam wat tang ban ïaid ruh la ïatakhuh paramet.
Ka jingsei briew jong ki kyrtong ha ka sngi thep kyrteng ka la kham palat liam ha ka sngi bishar kyrteng namarba ki kyrtong ki bym da pyni ïa ka jingbunpaid ha ka sngi thep kyrteng ki pyni ïa ka jingbun paid ha ka sngi bishar kyrteng.
Don kiba la kynthoh, jin lada ki paidbah ki mih sha surok kumba long ha kane ka samoi jied syiem shisien san snem ban kyrshan ïa ki jingdawa jong ka jaidbynriew na ka sorkar khlempep ka sorkar kan ym nud ban shu sngap mynthi hynrei kan jin da la pyrkhat arsien bad ki jingdawa kin ym sah pongding da ki snem ne da ki phew snem.
Kumba lah hi ban sngewthuh, ka jingmih jong ki paidbah da ki hajar ngut sha surok tang shisien ha ka san snem ka paw shai ba ka pisa ka treikam borbah hynrei lym kumta, u paidbah uba im kamai jakpoh mynstep bad thied khaw da miet un ym kwah ban pynbijai ei ïa la ka por ba kordor hynrei ka dei hi ka jingshah thied ha ka dor jong ki sbai ruba ba u paidbah ruh um salia ban ieh ïa la ka ing ka sem ban leit sngap ïa ki nia ki jutang jong ki kyrtong ïakhun elekshon sha ki lympung bad ban ïashad ïa kmen ha surok khlem salia.
Katba nang bun ki nongkyrshan, katta ki Kyrtong ki nang kmen. Hynrei u paidbah u dei ban sngewthuh shai ba kam don jingmut satia ka jingïashad mastieh ha surok pynban ki la dei ban pyrkhat bad ban puson sani ïa ka sngi ba kin pyndonkam ïa la ka jong ka itktiar khnang ba ka lawei jong ki khun ki kti bad ka pateng ka ban sa wan kan ym long ka jingtim, namarba wei ba la bakla ban pyndonkam ïa la ka jong ka hok ka iktiar ba la pynkupbor da ka riti synshar jong ka ri khlempep ki jingjynjar ki la ap lypa baroh san snem bad kin nang ïai bteng sa sha kawei pat ka samoi.
Ki paidbah ki dei ban tip shai ïa kane, ba ka rynsan pynshai paidbah jong ki kyrtong (common platform) ka kham shongnia shi hajar shah ban ïa kaba ki leit shad mastieh ha surok. Ha ki rynsan pynshai paidbah jong ki kyrtong, ki paidbah ki ïohlad ban bishar bad ban puson mano napdeng ki kyrtong kiba kham proh jabieng, kiba kham tam ka rynieng ka ryniot na baroh.
