Nongstoiñ, Rymphang, 8: Lyngba ka hok wad jingtip lane RTI, ka kynhun jong ka Mawshynrut Youth Movement hapoh ka jingïalam jong u Bah Shem Rynñiaw ka la lap ïa ka jingjyrsieh jong ka jingpyndonkam ïa ka skhim SRWP b ad CMSRDF, ha kaba u nongmihkhmat (MLA), u la ynlong Family business ïa ka skhim ki paidbah.
Lyngba ka RTI, ka Seng ka la pynbna paidbah ïa ki skhim ba la bhah sha u paidbah lyngba u MLA, kata ka skhim SRWP bad CMSRDF hapoh u snem 2018, ha kaba u nongïalam ka Seng u bah Shem Rynñiaw, u la ong ba ka RTI ka la pyni ïa ka jingtreikam u MLA ka la long pynban kum ka Family business.
U la ong ba ka mang tyngka lane ka funa jong u snem 2018-19 ka long T. 2,0000000, ka jingpynlut ka long T.1,61,46,766. Ha u snem 2019-20 ka long T. 2,0000000 klur katba ka jingpynlut ka long T. 1,99,6500. Ha u snem 2020-21 ka long T. 2,50,00000, ka jingpynlut ka long T. 2,2500000. Ha u snem 2021-22 ka long 2.50. Halor ka jingbym lap katkum ka RTI 2018-2021, ka long haduh T.63,88,234 lane hynriew phew lai lak phra phew phra hajar ar spah laiphew saw.
“Ka Seng ka la kyntu ïa ki nongmihkhamt ki ban sa wan ba kin ym pynlong family business ïa ka skhim u paidbah, kumba ngi lap la thied CGI sheet ne tin sop ïing haduh T 3,43,98000, ha kyrteng kiba haïing jong u MLA. Ngi kyntu ruh ban pyndonkam hok ïa ka skhim, khnang ban poi ha u paidbah ha ka por ba biang. Ka Seng ka ai jingmut ba ïa ki skhim ba shu soi ïa ki Utilisation Certificate tang da u MLA, Organization khlem kyrteng ne muhor bad shu soi da u BDO khlem ka jingtip ka shnong, kim long kiba pynhun ïa u paidbah ne ïa ki shnong”, ong u Bah Rynñiaw.
U Bah Bashan Mawrie ka Seng ka pynpaw ka jingbym hun halor ka pynlut pynsep ha ka por lynshop u COVID-19 ka ba long haduh 50 lak, katba sha ki paidbah ba bun ba shong quarantine ha ki shnong bapher bapher, ki bun kiba shu thied hi da ki ba ha ïing. Ka jingthied ïa ki 1500 tylli ki shuki plastic ha ka dor T.600 kawei ka long ka bym sngew ïa hap shuh, katba ha ka dor iew ka long tang 300 tyngka kawei.
Ka Seng ka kyntu ïa u ne ka MLA ba kin ïai trei shitom bad ban long u ne ka MLA jong ki paidbah ka constituency, ym ban long tang na bynta ka party ne tang na bynta kita kiba don ha ka list. Namar ha ka list hi kan don palat 40 hajar ki nongthep vote bad palat 1 lak ki nongshong shnong la don.
Hynrei, ki ba pynjop ïa ki pat tang 9 ne 10 hajar ki nong thep vote, ka list ka long pynban tang ka jingpyntieng, ka jingiuhroit bad pynartatien ïa ki briew jong ki hi. Lada kin peit na ka list hapoh 5 snem kim lah pyndep tang ïa ki leader ruh katba sha ki paidbah pat kan poi shuh lano. Ka long ka jingpynkheiñ ïa ka hok ki paidbah ban jied.
Ka Seng halor ka RTI jong ka MDC skhim 2019-2021 lyngba u bah Sebasius la kylli ba halor ka jingthied ïa ki solar light naduh u snem 2019-20 ha ka dor 2600000 (ar phew hynriew lak) khlem da ïohi tang kawei ka solar light hapoh constituency.
Kumta ka long ka jingbym lah ban mynjur, ka jing sam skhim MDC tang ha ki katto katne tylli ki shnong da ki phew phew lak kawei kawei ka shnong, ka long ka jingbym ryntih khlem da pyrkhat shuh ïa kiwei pat ki shnong kiba don hapoh ka constituency, ong u Bah Shem Rynñiaw.
