Pynlong ka SWKHDRC&MA ïa ka Adventure Training Camp na ka bynta ki NCC jong ka SSCM
Mawkyrwat, Rymphang, 08: Ka South West Khasi Hills District Rock Climbing & Mountaineering Association (SWKHDRC&MA) ha ka 7 tarik u Rymphang, 2023 kum shibynta ban pynshlur ïa ki samla pule jong ka Sngap Syiem College, Mawkyrwat kiba dei ruh ki dkhot ha ka National Cadets Cops (NCC) ha ka liang kumno ban long ki nongai jingïarap ne nongïada ïa kiwei ki para briew kiba ïa kynduh ïa ki jingeh kum ki jingmynsaw, ki jingngam jyllop bad kiwei de ki jingjia ka la ïoh ban pynlong da ka Adventure Training Camp hapoh ka Kynrewmyllah Adventure Training Centre and Eco Tourism Mawranglang, South West Khasi Hills Dist.
U bah Pilestar Nongsiej uba dei u President jong ka South West Khasi Hills District Rock Climbing & Mountaineering Association (SWKHDRC&MA) bad kum u trai jong ka Kynrewmyllah Adventure Training Centre & Eco-Tourism haba kren ha ka jingïalang ba lyngkot u la pynpaw ka jingsngewkmen ba u la ïoh lad ban ai jinghikai na ka bynta ki samla pule kiba dei ha kajuh ka por ki NCC jong ka Sngap syiem Collage, Mawkyrwat ha kaba na ka liang ka Sngap Syiem College, Mawkyrwat lyngba u Principal u la kyrpad ïa u ba un ïarap lem ïa ki samla pule ban ai ha ki ïa ki lad jinghikai kumno ban tip na ka bynta ban ïarap ïa ki briew (First Aids) na ka bynta kiba mynsaw ha kiba bun ki bynta kum ha ki jingjia ba kyndit kyndit, ha ki jingur ne jinghap kali, pluh ïing, bad kiwei de ki jingjia kiba khlem poi pyrkhat, bad kumjuh ruh kumno ban tip ban ai jingïarap ba kyrkieh ïa ki briew khnang ba kiba mynsaw kin ïoh ban lait im ne ïoh ki jingsuamr ha shwa ban pynpoi ïa ki mynsaw ha ki jaka sumar kiba biang.
Ha kane ka sngi u la ïoh ruh ban pynsngewthuh ba kum ki briew lada lap ne ïa kynduh ïa ki briew kiba jia ha ki kam ba mynsaw (accident) ne pluh ïing bad kiwei de ki dei ban long kiba la kloi ban ai jingïarap bad ha kajuh ka por la ïoh ruh ban ai jinghikai kumno ban kiew bad hiar bad kiew ïa ki maw bad ki riat ki ram da kaba pyndonkam da u tyllai, bad ruh na ka bynta ban tip kumno ban kam na shillang lum ne wah ban jam sa shillang.
Ha kawei pat ka bynta, u bah Pilestar Nongsiej u la ong ba ka Kynrewmyllah Adventure Training Centre & Eco-Tourism kaba don hajan ka Mawranglang Viewpoint kam dei eh tang ka jaka jngohkai pyrthei hynrei ka dei kawei na ki jaka ban ai ruh ki jinghikai pyntbit ïa ki samla kiba kwah ban wan shah ai jinghikai ha ki kam jngohkai pyrthei, ban ïarap ïa kiwei (Rescue Team) ban tip kumno ban long ki nongkiew ïa ki lum (Rock Climbing, Mountaineering bad ki wei de.
Namarkata, u buh ka jingkyrpad ïa ki samla na kane ka dong ka thaiñ jong ka South West Khasi Hills District bad na kiwei de ki distrik ba lada ki don kiba kwah ban pyntbit ïa lade ha kine ki bynta, ma u bad ka ka KATCAET ki don ki lad ki lynti ban ïalam ïa ki ha ki National Institution ki jaka ai jinghikai kiba pyntbit shuh kum ha Jammu Kashmir, Uttarakhand, Shimla bad ha ki ar tylli ki jaka hapoh North East, khnang ba kum ki samla kim dei ban shu kut tang ha la i jong i shnong hynrei ba kin kiew ruh sha jrong namar ba kane ka dei kawei ka lad ka lynti ïa ki samla ban kyntiew ha ki kam ïoh-kam ïoh-jam namar kane ka jingai jinghikai kaba ïajan bha bad ki kam shipai.
“Kane kan long ruh kawei na ki lad ïa ki samla ban ïoh kam shipai bad ym tang katta ka long ruh ka jingsarong ym tang ïa ki shimet hynrei ïa ka dong ka thaiñ, ka ri bad ka jaidbynreiw”, ong u bah Pilestar.
Nalor u bah Pilestar Nongsiej, President jong ka SWKHDRC&MA la ïa donlang u bah Pynkmenlang Pangrope, Associate NCC Officer jong ka NCC Sngap Syiem College ha ryngkat ki samla pule kiba dei ki NCC jong ka Sngap Syiem College ba kynthup ïa ki shynrang bad kynthei.