Shilllong, Jymmang 03 : Ka la long shisha ka jingsngewsarong ïa ka jylla Meghalaya hi baroh kawei lyngba ki saw ngut ki nongïalehkai ïakhun kti ka Jylla kiba la mihkhmat ïa ka ri India bad kiba la ïoh khur takma ha ka rynsan ïakhun kti ha Dubai.
Katkum ka kyrwoh khubor na u Bah Mainbor Khyriem uba dei u Assistant General Secretary jong ka MAWA bad uba don mynta ha Dubai ba kitei ki nongïalehkai kiba la ïoh khur takma ki kynthup ka Kong Margaret Pathaw kaba ïakhun ha ka kyrdan ba 70 kg (Masters women) kaba la ïoh jop ïa ka takam Ksiar ha ka left bad right hand.
Bah Hubert Paliar uba ïakhun ha ka kyrdan 70 kg Hearing Impairment u la ïoh khur ïa ka takma Ksiar ha ka Right hand bad ïa ka takma Rupa ha ka Left hand, ka Airikmenlang Shabong kaba ïakhun ha ka kyrdan 50 Kgs (Youth girls) ka la ïoh ïa ka takma Rnong ha ka Right hand bad left hand bad u Bah Alexander Lyngdoh uba ïakhun ha ka Hearing Impairment 80kg u la ïoh khur ïa ka takma Rnong ha ka left bad right hand.
