Hiar u Bah Sniawbhalang Dhar ha madan Kiang Nangbah Stadium ban pynkhreh ïa ka DPR ba 25 klur

Jowai, Jymmang 03 : U Bah Sniawbhalang Dhar uba dei u symbud Myntri Rangbah ka sorkar jylla mynta ka sngi ula hiar jurip ha madan Kiang Nangbah Stadium, Jowai shi bynta ban pynkhre ïa ka Detail Project Report (DPR) kaba la kot haduh 25 klur tyngka ban pynshna thymmai ïa katei ka madai ïalehkai katkum ka juk ba mynta.
Ïa u Bah Dhar la synran lang da u Commissioner and Secretary ka Sports and Youth Affairs jong ka sorkar jylla, u Dr. Vijay Kumar D, IAS ha rynkat ka jingdonlang u Bah Khroobok Passah District Sport Officer ka West Jaiñtia Hills District, u Bah EMH Passah, Working President ka West Jaiñtia District Sport Association (WJDSA), Bah u Patrick Lamare Vice President, ma Lamat Oo Laloo, General Secretary nalor kiwei de ki dkhot ka Association.
Na ka liang u Bah Sniawbha ula leit jurip ïa kane ka madan shi bynta ban buddien ïa ki jingkular jong u ha ka sngi ba wan pynhap pyrda jong u ïa ka jingrakhe dap 50 snem ne ka Golden Jubilee Celebration jong ka West Jaiñtia District Sports Association (WJDSA) ha ka 22 tarik u ïaïong, ban pynïoh haduh 25 klur tyngka na ka bynta ban pynbha pynmiat ïa ka Kiang Nangbha Stadium Jowai.
Kumban shu pynkynmaw u Bah Dhar ula kular ruh ban ai shiphew lak tyngka sha ki bor pynïaid ka WJDSA na ka bynta ban pynlong ïa ka lympung ‘Open to all Football’ ka ban tip ha ka kyrteng u kpa jong u, u (L) K. Pala uba dang shu khlad shen. Na ka liang u Bah Sniawbha ula ong ruh ba ka jingïalehkai Sports khamtam ka phutbol kam dei shuh tang ban kilan met ne ban rah nam ïala ka jong ka kynthun hynrei ka dei kam kamai na ka bynta ki khun samla.