Kano kano ka jinglong ka saiñhima sima kam ju neh ne sah hajuh hynrei ka kylla stet katkum ka jingïaid jong ki shalyntem ne ka jingtyllun jong ka por. Ha Meghalaya ruh, imat, nangne shakhmat, ka saiñhima sima ka la kylla dur noh da kumwei pat. Ïa kane lah ban sakhi, tang shu poi ka aiom elekshon, ka jingmih ki sengsainpyrthei ba thymmai ka la pynkulmar thlim ïa ki paidbah.
Kaei ka daw kaba pynlong ïa kine ki nongmihkhmat paidbah ban kylla rong manla ka aiom? Hato ka dei na ka jingshah thied ha ka bor tyngka lane ka dei da ka mon lajong shimet ba ym ïahap shuh ïa ki rukom treikam lane ka don ka jingbym ïasngewthuh jingmut hapoh ka party?
Mynta la jan ar taiew tam, ka khubor shaphang ka jingher ki khubor hamsaïa ba ki MLA ka Peoples Democratic Front (PDF) bad la ki synran (nongkyrshan) kin sa pynduh pyndam noh ïa kane ka party kaba la seng ha shwa ka Elekshon 2018 bad hadien kata kin sa leit ryngkoh sha ka National Peoples Party (NPP) kum ki dkhot bapura.
Ka jingïohbat jong ka National Peoples Party ïa u lakam synshar ha ka wat kaba ar ka la pynskuiñ ïa ki seng sain pyrthei ban ïatreilang kumba long ha ka wat kaba nyngkong jong ka Meghalaya Democratic Alliance (MDA-I), kata, NPP-UDP-PDF-BJP bad HSPDP. Baroh ki MLA kiba la jop ha u snem 2018 kiba don ha ki seng saiñpyrthei bapher bapher kim lah shah satia ban shah pynshong ha ka Liang Pyrshah namarba ka jingdawa hapoh ki Constituency jong ki, ki long kiba bun.
Watla ka Congress bad ka All India Trinamool Congress bad ka Voice of the People Party kiba shong mynta ha ka Liang Pyrshah lehse lada ïoh ka lad kin kwah beit ban don hapoh ka Sorkar hynrei ka jingeh ka long ba ka Congress kaba ïatreilang bad ka TMC hapoh Delhi kin kiar raimaw raidieng ban ïatreilang bad ka Sorkar MDA ba la ïalam da ka NPP da ka jingkyrshan ratbah jong ka BJP na Delhi. Toi, ka VPP ka pynpaw beit ba kam da don mon than ban ïatreilang bad ka Sorkar ba la ïalam da ka NPP namarba kan hap ban bat ïa la ka jong ka jutang kumba ka la khlei ha ka por elekshon. Lehse, ka jingïai shah jong ka VPP ban shong ha ka Liang Pyrshah kan kham ïohlad ban pynlut por ïalade bad ki paidbah ban pynshai ïa ki nongrim treikam khnang ka lynti kan long kaba suk ban ïaid ynda la poi ka sa ka samoi elekshok sha ka Iingdorbar Thawaiñ Lok Sabha bad ha ki Autonomous District Council.
Haba shu bishar ïa ka jingïathuh jong u Myntri Rangbah ka Jylla u Conrad Kongkal Sangma ba ka la don ka jingïapynbeit bad ka jingïakren bad ki nongïalam ka PDF ka paw shai ba ki arngut ki MLA ka PDF ki kwah ban ïoh shong shuki Myntri namarba u Bah Banteidor Lyngdoh u long u Myntri hapoh ka Sorkar MDA-I ba la ïalam da ka NPP. Ka por kan sa batai, la kane ka jingpyrshang jong kine ki arngut ki MLA ka PDF lem bad la ki synran ban leit pynïasoh bad ka NPP kan pynmih neem ïa u ioh uba thïang ne ïa u soh uba jew ha ka elekshon sha ka Ingdorbar Thawain ka ban sa long ha u snem 2028?
Ki Seng Saiñpyrthei kiba kham kongsan ha Meghalaya kiba don MLA kumba long mynta ki long ka NPP, UDP, TMC, Congress, VPP, HSPDP, PDF, BJP nalor arngut ki Independent.
Hadien ka elekshon ha Sohiong Constituency khlempep ka saiñhima sima kan sa kylla bad ngin shu ïa peit kaei ka ban jia ïa ka sainhima sima hadien kane ka elekshon.
