Syrtok ki paidbah Langpih ha ka leit ka wan, kyntu ïa ka sorkar ban maramot ïa ka surok

Nongstoiñ, Jymmang, 3: Ka jingsniew palat jong ka surok kaba jngai tang shi kilomitar, na ïew Langpih ha lad Mawdiangsnam ha ka surok bah ba la shna da ka sorkar Assam, ka la buh ïa ki paidbah ha ka jingeh kaba khraw khamtam eh ha ka kit ka bah bad ka leit ka wan.
U bah Hesding Sangleiñ Secretary shnong Langpih haba ïakren bad u nongthoh khubor, u la ong ba ha ki snem ba la dep baroh ka Dorbar shnong ka la ju lum ïa ki paidbah ban maramot hi ïa katei ka surok da kaba pynlut ïa ki sngi ki por ban pynbha ïa ka. Ym tang ba ki pynlut sngi ha kaba trei paidbah, hynrei ki la pynlut ruh da ki phew hajar tyngka ban phah kit maw ha ki trok ban thep ha ki thliew ki syar, hynrei ynda la wan ka aïom slap ka surok ka la kham sniew shuh shuh.
U la ong ba hadien bun bun snem, na ka liang ki paidbah nongshong shnong ki la ud ki la nam namar ban shu pynlut por man la ka snem ka shem shitom haduh katta katta. Kumta u la ong ba ki paidbah ki la shu iehnoh kumto khlem maramot shuh, hynrei ki la shu pynkhuid noh tang ïa ki sañium ha baroh ar liang surok.
U bah Sangleiñ u la ong ba u la leit ban ïakynduh ïa ki heh sorkar, hynrei ki la jubab ba kim don lad ban ïarap ban pynbha ïa katei ka surok. Nalor kata u la ïathuh ruh ba u ha kine ki snem ba la leit, u la ïakynduh ïa ki nongmihkhmat kum u MLA bad MDC, hynrei kitei ki nongmihkhmat ruh kim shym ai kano kano ka jubab hynrei la la shu sngap jar. U la ong ruh ba ka jingsniew palat jong katei ka surok, ka buh jingeh haduh katta katta ïa ki paitbah namar ki dei ki nongrep bad ki hap ban leit die ïa ki mar rep jong ki sha ïew Hahim bad Boko.
Nalorkata ki kali kiba ïaid na katei ka surok, ki dei kiba wan pynpoi ïa ki mar bam na Assam sha ki shnong bapher bapher kiba don ha katei ka thaiñ. Kumta ki shem shitom haduh katta katta ban ïaid na katei ka surok lait noh ki trok Fourwheel. Khatduh eh u la kyntu ïa ka sorkar ba lada don lad kan phai khmat lem sha ki paidbah jong katei ka thaiñ bad ban phah maramot ïa katei ka surok, namar kam dei kaba jrong ka don tang shi kilomitar bad lada ka sorkar ka mon ban leh kam don jingeh satia.