Shongshit ka lympung ïalehkai jong ki khynnah skul ka 9th Chief Minister’s DLI-SAM 2023

26 tylli ki skul bad 824 ngut kiba ïashim bynta

0

Mawkyrwat, Jymmang, 03: Ka lympung ïalehkai jong ki khynnah skul kaba lai sngi hapoh jong ka South West Khasi Hills District ba la tip kum ka “9th Chief Minister’s District Level Inter-School Athletics Meet 2023, South West Khasi Hills District” mynta ka sngi ka la sdang bad la ïoh ban plie pyrda ha kaba u bah Carnes Sohshang, MDC jong ka Mawkyrwat Constituency u la long u kongsan.
Ïa kane ka lympung ïalehkai la pynïaid da ka ophis jong u District Sports Officer, South West Khasi Hills ha kaba ki la don haduh 26 tylli ki skul bad haduh 824 ngut ki nongïashimbynta ha ki jingïalehkai bapher bapher ha kaba ïa kane la pynïalehkai hapoh ka madan Saitsnad, Mawlangwir, South West Khasi Hills District.
U Bah Carness Sohshang haba kren kum u kongsan u la ong ba ki jingïalehkai ki long kaba donkam na ka bynta ka jingheh jingsan jong u briew hajan baroh ki liang. “Ka Sports and Games ka long kum shibynta jong ka prokram ha ki skul bad ka por leit skul ka dei ka por kaba biang tam ha kaba u khynnah u lah ban wad ïa kaei kaba u sngewtynnad bad ha kajuh ka por u lah ban pynpaw ïa la ki sap ki phong lyngba ka Sports bad Games”, u la bynrap.
Namarkata, u la ïaroh ruh ïa ki nongpynïaid jong ka jingïalehkai kiba la pynlong kum ïa kine ki jingïalehkai kiba lah ban kyntiew bad ai jingmyntoi ïa ki khynnah skul. Ha kajuh ka por u la pynpaw ïa ka jingsngewkmen ban ïohi ïa ka jingbun jong ki nongïashimbynta ha kane ka snem khamtam na kito ki jaka kiba jngai kynthup ïa ka Ranikor Block. Haba bynrap shuh shuh ïa ka kren u la ong ba ka jingïalehkai ym tang ba ka pynlong ïa u briew uba shait bad khiah krat hynrei ka pynkhlaiñ bad tei ym tang ïa ka bor met hynrei wat ïa ki jingmut jingpyrkhat bad ha kajuh ka por ka pynshlur bad ai mynsiem ïa ki khynnah ban don ka mynsiem ïakhun bad ka jingïatrei lang.
Kumta u la pynshlur ïa ki nongïashimbynta ban don ka mynsiem jong ka jingïakhun ban jop bad ban wanrah ka nam ka burom ym tang ïa ka skul hynrei wat ïa ka ri bad jaidbynriew. Ha ka jingkren jong u u la kyntu bad ai mynsiem ïa ki khynnah ba kin pyndonkam hok ïa la ka sap ka phong da kaba u la pynkynmaw ruh ïa ki ba kin ym klet ïa la ka kamram kum ki khynnah skul da kaba minot ha ka kot. U la ban jur ruh halor ka jingdonkam jong ka jingbiang por bad ka jinglong ryntih ha baroh ki liang khamtam eh ha ki khynnah skul bad kyntu ruh ïa ki bor pynïaid jong ka jingïalehkai ban peit bad ban pynbiang ïa ka jingdonkam jong ki nongïashimbynta ha baroh ki liang ha baroh kine ki lai sngi ba don kane ka jingïalehkai.
Ha kane ka sngi plie pyrda la ïadonlang naduh u bah Damang Syngkon, District Sports Officer, South West Khasi Hills District uba la shim ïa ka bynta ban ai ki kyntien pdiang sngewbha, ka kong Y. Mawlong, Additional Deputy Commissioner, South West Khasi Hills District, u bah D. Mawleiñ, MPS, Deputy Superintendent of Police, South West Khasi Hills District, kiwei de ki ophisar sorkar, ki nonghikai skul lem bad ki khynnah skul.

Leave A Reply

Your email address will not be published.