Khur ka Sham Sham SS ïa ka nam ‘Overall Champion’ haka District Level Inter School Athletics ha EJHD

Jowai, Jymmang 03: Ka Sham Sham Secondary School kala long syndon ka nongjop kum ka Overall Champion Team, da kaba kamai haduh 89 point hynnin ka sngi Thohdieng bala pynhap pyrda ïa ka East Jaiñtia Hills District Level Inter School Athletics Meet-2026, ha madan Teilang Dkhiah West, East Jaiñtia Hills District.
Haka jingïalang pynkut la wan ban don lang u Deputy Commissioner ka EJHD u Manish Kumar, IAS kum u Kongsan haka jingdonlang ka District Sports Officer (DSO), ka Stephanie M Rapsang, Principal Jaiñtia Eastern College (JEC), Dr. P. Nongtdu, ki ophisar, ki dkhot ka (EJHDFA) ki nonghikai bad ki khynnah skul.
Ha kane ka sngi pynkut la sam ruh ïa ki khusnam sha ki nongjop, ha kaba ka Memorial Higher Secondary School bad ka Sham Sham Secondary School kila long kum ki Champions haka Under-14 bad Under-16 jong ki khynnah shynrang bad kynthei.
Ka Wapung Higher Secondary School bad ka San Shnong Secondary School kila jop haka Under-18 Boys bad Under-18 Girls. Katba ka Sham Sham Secondary School kala jop kum ka Overall Champion jong une u snem.
La sam ruh ïa ka khusnam sha ki nongjop ba marwei ‘Best Athletes’ sha ki lai tylli ki kyrdan, u Ready Ryngkhlem naka Wapung Higher Secondary School ula ïoh ïa ka nam Best Male Athlete bad ka Lamsaka Dkhar naka Sham Sham Secondary School kum ka Best Female Athlete haka kyrdan Under-14. Haka kyrdan Under-16 Category la ïoh da u Highbornson Muksor naka Khliehriat Presbyterian Secondary School bad ka Sandiya Dkhar naka Sham Sham Secondary School. Katba ha ka kyrdan Under-18 Category la ïoh da u Lastduh Lamurong naka Don Bosco College bad ka Rosy Sana naka San Shnong Secondary School, Mukhaialong.
La pyntip ba ki nongjop ha kane ka District Level Inter School Athletics Meet-2026 kin ïoh ban leit ïashim bynta ha ka District sha ka State Level Inter School Athletics Meet ka ban sa pynlong shen.