Shillong, Jymmang 03: Ka Mawlai SC ka la ïakhaid mar 1-1 kol bad ka ARA FC jong ka Gujarat ha ka jingïakhun kaba lai jong ka Group A ha ka I-League 3 jong ka samoi 2025-26 kaba la long ha Khuman Lampak Stadium ha Imphal.
Na ka bynta kane ka jingïakhun kaba lai, u coach ka Mawlai bah Hering Shangpliang u la wanrah ar tylli ki jingkylla ha ka kynhun ba sdang, da kaba wanrah ïa u Vincent Shyrmang bad u Kevin Rymbai ha ka jaka jong u Ricky Chyne uba la ïoh red card ha ka jingïalehkai ba ladep, bad u Basuklang Bina.
Ka kylla step ka la kut ha kaba ka ARA FC ka la lamkhmat ïa ka jingïakhun lyngba ka kol jong u Moinuddin (18′), hynrei, kumba la jia ïa ka Mawlai ha ka jingïalehkai ba ladep, ka ARA ka la hap ban ïalehkai pyndep da tang 10 ngut ha madan hadien ba u Rohit Chawla u la shah beh ha ka minit kaba 57 hadien ba ïohpdiang ar tylli ki yellow card.
Nangta ka Mawlai ka la ïoh ba kan pynïakhaid lyngba ka penalty hadien ba u Robertson Khongriah u la shah pynur hapoh phyllaw kol (box), ha kaba u Damanbhalang Chyne u la wan shakhmat ban thep lyngba kane ka penalty.
Hadien lai tylli ki jingïakhun, ka Mawlai ka la khur 4 point lyngba ka jingjop pyrshah ïa ka Sikkim Brotherhood bad da kaba ïakhaid hynne ka sngi. Ki la shah rem ha kawei ka jingïalehkai pyrshah ïa ka Sunrise Orissa.
Ka Mawlai kan pynkhreh sa ïa ka jingïakhun pyrshah ïa ka FC Raengdai kaba lamkhmat ïa ka Group lashai ka sngi Ba-ar, ka 05 tarik Jymmang ha ka por 3 baje nohphai sngi.
