MSL 5: Pynthikna ka Mawlai ïa ka jaka ha ka pre-QF; Wan ha khlieh duh ka Nangkiew ha ka Group A

Shillong, Jymmang 03: Ka Mawlai SC, kaba bat ïa ka nam lahduh, ka la pynthikna ïa ka jaka ban rung sha ka pre-quarterfinal jong ka 5th Meghalaya State League da kaba pynliem noh ïa ka Lamin XI SCC da 2-1 kol ha ka Group C ha Amlarem ha ka sngi Saitjaiñ.
Ka jingkylli kaba mih mynta ka long hato ka kynhun ïalehkai ki khynnah samla ka Mawlai kin lah ne em ban ïakhun pyrshah ïa ki jingeh nangne shakhmat, khamtam hadien ba ki la ïakhaid bad ka Laskein SCSC ha ka 28 tarik ïaïong. Kumba ka long mynta, ka Mawlai ka la phah ïa kiba bun ki rangïalehkai ba la kham rangbah jong ka ban ïakhun ha ka I-League 3, hynrei ki khynnah samla kiba dang sah ki la pyndep ïa la ka jong ka kamram ha ka lympung bah jong ka MSL hapoh ka jylla.
U Syndongmiki Lyngdoh (9’) bad u Livingson Lyngdoh (77’) ki la pynkhihjar na ka bynta kane ka lahduh jong ka samoi 2024-25, katba u Genial Lamin u la pynïakhaid shipor ïa ka jingïalehkai ha ka minit kaba 63 na ka bynta ka Lamin XI kaba don ha trai duh jong ka Group.
Ha Shillong, ka Nangkiew Irat SC ka la pynthikna ba kin pyndep ïa ka kylla ïakhun ba nyngkong ha ka kyrdan ba ha khlieh duh ha ka Group B hadien ka jingjop da 6-1 kol pyrshah ïa ka Mawphu SC. U Jefferson Pakyntein (16′, 32′, 57′) u la ïoh ban thep hat-trick, ryngkat bad kiwei de ki kol ba la thep da u Dibinroy Nongspung (4′), u Ronaldkydon L Nonglait (44′) bad u Nikelson Bina (83’P). U Banman Roy Nongsiej (54′) u la pynkhih ïa ka shi kol jong ka Mawphu hynrei ka la shah lamkhmat lypa da 4 kol ha katei ka por.
Kumjuh ha ka Group E la sakhi ïa ka Lumphyrnai Sohphoh FC kaba la buh jaka ïalade ha ka pre-quarter hadien ba ka la wanphai na ka shi kol ban pynliem ïa ka Lamyrsiang SCC da 3-1 ha Wahiajer.
U Eborki Marsharing (14′) u la pynkhihjar dang kloi na ka bynta ka Lamyrsiang hynrei ka Lumphrynai Sohphoh ka la wanphai da kaba tyngeh ha ka kylla miet lyngba ki kol jong u Phrangsngi Law (52′) bad u Sonowel Kharsati (79′, 81′). Watla ki dang sah sa ar sien ïakhun ha kane ka Group, hynrei ka Shillong Lajong FC bad ka Lumphrynai Sohphoh ki la dep ban pynthikna ba kin jam shakhmat, watla kano ka kynhun ka ban wan ha ka kyrdan ba ha khlieh duh yn dang hap ban rai.
Ha kawei pat ka liang ha ka Group D, ka Ladthadlaboh SC ka la pynjemkhnap ïa ka Jalaphet Moochut Pyrdung SC da 10-1 ha Khliehriat. Baroh ar tylli ki kynhun kim pat shym la jop satia shuwa kane ka jingïakhun bad baroh arliang kim don jingkyrmen shuh ban rung sha ka Round of 16.
Hynrei kane kam shym la khanglad ïa ka Ladthadlaboh kaba la rung semifinal ha ka MSL 2024-25, ban thom naphang ïa ka liang pyrshah ban khur ïa ka jingjop kaba khraw bad ka la pynkhihjar lyngba u Sandeep Siangshai (7′, 16′), u Andrew Nanghuloo (10′, 49′, 51′), u Shanhok Siangshai (14′, 22′, 24′) bad u Wansa-oo Latoo (70′, 79′), katba u Tiyo Syrti (53′) u la thep ïa ka shi kol na ka bynta ka Jalaphet.
Ka la don ruh ka jingjop kaba shongkun na ka bynta ka Mishon SSCC ha Mairang, ha kaba ka la pynliem noh ïa ka Umlakro SC da 3-0 ha ka Group F. Kiba la pynkhihjar ha kane ka jingïakhun ki long u Damanbhalang Ryntathiang (35’, 67’) bad u Mebanlambeit War (53’).
Ha kane ka sngi Saitjaiñ la sakhi ruh ïa ar tylli ki jingïakhun kiba la kut ha ka jingïakhaid kaba khlem kol. Kine ki jingïakhun kiba la ïakhaid ki long hapdeng ka Janepih YSCA bad ka Maram FC- kiba wan kyrdan ba nyngkong bad ba-ar ha ka Group G ha Williamnagar, bad ha Mawkyrwat hapdeng ka Mawlarshong SC bad ka Mawten SC ha ka Group H.
Kin don tang ar tylli ki jingïalehkai ba la buh ban long ha kane ka sngi Nyngkong, bad baroh ar kin sdang ha ka por 3 baje nohphai sngi. Ha ka Group E, ka Iatyllilang Lumsehkot CSC kan aireng pyrshah ïa ka Lumphyrnai Sohphoh FC ha Wahiajer, bad ha ka Group G ka Balmanduri FC pyrshah ïa ka Attong Matgrik FC ha Williamnagar.