Shillong, Jymmang 03: Ka Shillong Lajong FC ka la lah ba kan pynjemkhnap haduh 4-0 kol ïa ka Chanmari FC ha ka jingïakhun Championship Round kaba ar kaba la long ha SSA Stadium ha ka janmiet sngi Saitjaiñ, kaba la pynneh pynsah ïa jingkyrmen ban ïaknieh ïa ka nam lahduh ha ka Indian Football League 2025-26.
U Phrangki Buam (45’+1) u la pynkhih ïa ka kol kaba nyngkong ha ki minit pynjlan ba khatduh shuwa ban jam sha ka por shongthait bad ka kynhun ka la bynrap sa lai tylli ki kol ha ka kylla miet ban pynskhem ïa ka jingjop. Kine ki lai kol ha ka kylla miet la thep da u Tremiki Lamurong (70′), u Everbrightson Mylliempdah (77′) bad u Damaitphang Lyngdoh (86′).
Ka liang pyrshah ka la shah pynshitom tang katto katne minit ba la sdang ka jingïalehkai hadien ba u Joel Lalramengmawia u la shah beh noh namar ba shah sei ar tylli ki yellow card ha ka minit kaba 16.
Na ka bynta kane ka jingïalehkai, u coach ka Lajong u Birendra Thapa u la wanrah lai tylli ki jingkylla ha ka kynhun ba sdang kaba ïakhun pyrshah ïa ka Dempo ha ka sngi U Blei ba ladep – da kaba wanrah biang ïa u Siwel Rymbai kum u nongap kol ha jaka u Ranit Sarkar, katba u Jakob Vanlalhimpuia bad u Abhay Gurung ki la bujli ïa u Gladdy Kharbuli bad u Everbrightson.
Da kane ka namjop ka Lajong ka la ïoh ban kamai 21 point ha ka kyrdan ba ar ha ka miej, bad ka dang duna 4 point hadien ka Diamond Harbour FC.
Watla ka jingkyrmen ka kham noh sha ka DHFC, hynrei ka jingïaknieh nam lahduh ka dang jur hadien ba ka Diamond Harbour ka la mad ïa ka namrem da 2-1 ha ka Sreenidi Deccan hynne ka janmiet sngi U Blei.
