khur ka Nongstoiñ Public School bad ka Anderson HSS ïa ka nam Best Team

Nongstoiñ, Nailar 09: Ka West Khasi Hills District Badminton Association (WKHDBA)- Nongstoiñ, ha ka Sngi Palei (08 tarik Nailar, 2024) ka la ïoh ban pynhap pyrda noh ïa ka lympung ïalehkai Badminton hapdeng ki skul jong ka thaiñ kaba la tip kum ka 15th Inter School cum District Open Badminton Tournament 2024.
Ïa katei ka lympung la wan ban pynhap pyrda noh da u Bah H.K.Thabah MCS Additional DC ka West Khasi Hills District u ba la long ruh kum u Kongsan bad la synranlang ruh da ki dkhot jong ka synjuk Badminton ka ka WKHDBA.
Kane ka lympung ïalehkai Badminton kaba lai sngi lynter la sdang naduh ka 6 tarik mynta u Nailar, 2024 ha kaba la wan plie pyrda ïa ka jingïalehkai da u Bikram D Marak – Superintendent of Police jong ka West Khasi Hills District, bad haduh 91 tylli ki jingïakhun la pyndep ha kine ki lai sngi.
Mynta u snem, khnang ban pynlong ïa ki player ba kin pynleit jingmut ha jingtbit jong ki, ka synjuk ka la rai ban pynlong tang ki jingïalehkai kynhun lane Team Events na bynta ki skul, katba ha ka Open Category, ki kyrdan ïalehkai ki don bun tylli, naduh ka U-13, U-15, U-17 kiba ki nongïashimbynta ki lah ban ïakhun ha ka thup ba tang marwei bad shijur (Single & Double), katba ha ka U-19 ka kynthup ruh ïa ka Mixed Double, bad ka kyrdan Senior ka kynthup ïa ki Shynrang bad Kynthei bad ruh ka Mixed Double.
Ki skul kiba la wan ïashimbynta na ka thup ïakhun ki shynrang ki long: Anderson HSS, St.Xavier HSS, Nongstoin Public Secondary School, Ferrando Secondary School kiba rung mar ar kynhun, katba ka Sibsingh Memorial Govt.HSS bad ka Mawiong Lumsyntiew SS, Mount Hermont Academy SS ki la ïashimbynta tang mar kawei. Baroh ki long 11 tylli ki kynhun na ka Boys Event.
Nangta na ka thup ïakhun ki kynthei ki long: Anderson HSS (ar kynhun), St Xavier HSS (ar kynhun), Ferrando SS (3 kynhun), Nongstoin Public SS, Sibsingh Memorial Govt HSS, Mount Hermont Academy SS da mar kawei, bad baroh ki long 10 tylli ki kynhun na ka Girls Event.
Haba phai sha ki kynhun, ka Nongstoiñ Public School ka la ïoh ban khur ïa ka nam jop kum ka best team napdeng ki kynthei bad ka Anderson Higher Secondary School na ki shynrang.