SHILLONG, Nailar 09: Mynta ka sngi ki paid riew ieid phutbol ka jylla Meghalaya kin sa ïoh ban sakhi ïa ka jingïakhun hapdeng ar tylli ki klob trai jylla (Derby), ka Shillong Lajong FC bad ka Rangdajied United FC, ki ban ïatynjuhbor mynta ka sngi na ka Group-F jong ka lympung 133rd IndianOil Durand Cup 2024 ha JN Stadium, Polo.
Ka jingïakhun hapdeng kine ki ar kynhun kan sdang ha ka por 4 baje nohphaisngi, bad la khmihlynti ba kane ka jingïalehkai kan khring ïa bun ngut ki nongpeitkai.
Haba phai sha ka Lajong, ka kynhun ka don mynta ha ka kyrdan ba ar na ka Group-F da lai point hadien ba ka la jop da shi kol ïa ka Tribhuwan Army Club ha ka sngi sdang ïa ka lympung.
Katba ka Rangdajied (kaba la bujli ha jaka ka Hyderabad FC) ka la pynshohbiej ïa kiba bun hadien ba ka la lah ban ïalehkai bha ha ka jingïakhun ba nyngkong pyrshah ïa ka FC Goa, hynrei rem da ka said da 4-3 kol.
Kane ka jingïakhun kan long kaba itynnat namar baroh ar kynhun ki donkam ban khur ïa ki lai point ba kongsan ban buh jingkyrmen ïalade ban jam sha ka wat ïakhun kaba bud ha kane ka Durand Cup 2024.
Lada jia ba ka Lajong ka khur ïa ka namjop kan ïaryngkat point bad ka FC Goa kaba don mynta ha ka kyrdan ba nyngkong na ka Group-F hadien ba jop ar sien lynter ki jingïalehkai. Katba na ka liang ka Rangdajied United FC kan ïakhun shitom ban khur ïa ki lai point ba nyngkong na kane ka Group.
Ka jingïalehkai kan long kaba itynnat hapdeng kine ki arliang mamla namar baroh ar kin ïakhun katba lah ban khur shalade ïa ki 3 point ba kongsan.
