Shillong, Lber 12 : Ka Madanryting SC bad ka Kick Start FT Academy ki la khur jingjop ha ka lympung ïalehkai phutbol U-14 (Boys) Football League 2023 ba pynïaid da ka Shillong Sports Association ha ki jingïalehkai ha ka sngi Saitjaiñ ha madan Polo.
Ka Madanryting SC ka la khur jingjop da kaba pynliem ïa ka Summit Academy da 5-0, katba ka Kick Start FT Academy ka la pynliem da 4-1 kol ïa ka Mylliem Grass Root. Katei ka lympung ka la ai mynsiem shibun ïa ki khynnah ha kaba ki la ïoh ban pynpaw pyrthei ïa la ki sap ïalehkai phutbol hapdeng para khynnah.
Kadei ruh ka sien kaba nyngkong mynta ka samoi ba ki khynnah ki la ïoh ban mih madan ha ki lympung ïalehkai phutbol khamtam ba la pynïaid da ka Shillong Sport Association (SSA), ha kaba ki khynnah ki la ïoh ban ïalehkmen bad mih madan da ka mynsiem kaba thrang ban khur ïa ka jingjop.
Haba phai sha ka jingïalehkai, na ka bynta ka Madanryting la thep da u Jefferson Kharmawphlang (18min), Medonborlang Mawrie (20min), Kitboklang Mawrie (24min) bad u Wanlamkupar Kharsahnoh u ïoh ban thep ar kol (37&53min). Ïa ki saw kol na ka bynta ka Kick Start la thep da u Ïaisynroplang Syiemlieh (23min), John W Nongsiej (31min), Aitenjoy Nongkhlaw (42min) bad u Wanbhalang Kharmawlong (60min) katba shi kol ïa ka Mylliem Grass Root la thep da u John Janai Khardewsaw (55min).
