Ïakynduh ki heh MSOA ïa ka President IOA halor ka jingpynkhreh ïa ka Meghalaya National Games
Shillong, Lber 12 : Ka Meghalaya State Olympic Association (MSOA) ha ka 11 tarik Lber 2023, ki la leit ban ïakynduh ïa ka President ba thymmai jong ka Indian Olympic Association (IOA) ka Dr PT Usha kaba dei ruh ka nongïalehkai ba khur ïa ka khusnam Padma Shri bad Arjuna halor ka jingpynkhreh jong ka jylla ïa ka National Games.
Ha katei ka sngi na ka liang ka MSOA ka la ai ka jingbatai kaba bniah halor ka jingpynkhreh ïa ka National Games kaba 37, ha ka jingdonlang u Secretary General jong ka GTCC u Kalyan Choubey, bad u Amitabh Sharma, Executive Council Member bad Chairman ka GTCC – 37th National Games. Na ka liang ka MSOA la leit ban mihkhmat da u Bah John F KHarshiing uba dei u Working President bad ka Kong Matsiewdor War Nongbri, Vice President, Meghalaya State Olympic Association, lyngba ka Archery Federation of India, ha ka Special Annual General Meeting jong ka Indian Olympic Association kaba la pynïaid da ka Dr PT Usha, President, IOA.
Ha katei ka jingïalang ka President, IOA ka la ong ba ki nongkitkam ki dang shu shimti ïa ka kam hapoh IOA bad ka thong ka long ban trei shitom ban ïoh pynlong ïa ki National Games kumba la mang sha ki jylla bad ban pynlong ïa ki man ka snem ban pyndep ïa ki National kumba la mang ha Goa, Chattisgarh, Uttrakhand bad Meghalaya.
Ha ki jingïakren u Bah John F Kharshiing, Working President, Meghalaya State Olympic Association, u la pyntip sha ka President IOA ba ka jylla Meghalaya ki la mad jingeh ha kaba la hap ban pynkylla bun ki phang treikam namar ka jingkhang dam na ka daw ka khlam Covid-19, hynrei hadien ba la wan biang ka jingshngaiñ ka MSOA ha ryngkat ka DSYA ki la trei shitom ban pynim bad pynlong ïa ka 3rd State Games ha u Rymphang 2020, ka 4th State Games ha u Jymmang 2022 bad la pynlong ruh ïa ka 2nd North East Games ha u Naiwieng 2022 kaba la long ka burom ïa ka jylla bad ba ki don bun ki jingtei kiba la trei bad ïaid shakhmat bad kita ki jingtei ki jaka ïalehkai ki don ha ki phase bapher bapher ha baroh ar jaka kata ha Shillong bad Tura kum shibynta ka jingpynkhreh ïa ka National Games.
Shuh shuh u Working President, MSOA u la pyntip ha ka President, Indian Olympic Association ba katkum ki jingai jingtip na ka tnad Sports ka paw shai ba antad tam ne duna ka jylla kan sa lah ban pynlong ïa ka National Games ha u snem 2025. U la pyntip ruh ba u heh ka IOA u (L) RK Sachetti, Chairman, barim ka GTCC Committee na ka bynta ka jylla Meghalaya, u la wan iuh kjat ha Shillong ha u Kyllalyngkot 2020, hynrei sngewsih ba u la khlad kyndit ha u Jymmang 2021, bad haduh kine ki sngi na ka IOA ym pat ïoh jingtip mano ban wan mihkhmat na ka IOA ban ïasyllok ban khmih ïa ki kam bad ban ïakynduh bad ka MSOA bad ka sorkar jylla ha kaba ïadei bad ka National Games.
U President IOA u la ong ba ki nongkitkam ba thymmai ki dang shu shimti ïa ka office jong ka Indian Olympic Association bad hadien ka jing khmih bnai ïa ki kam kin sa pynlong hashen ïa ki jingïakren bad ka Meghalaya State Olympic Association ban ïakren halor u snem na ka bynta National Games hapoh jylla Meghalaya.
Hashuwa kane ka jingïalang bad ka President IOA ha kamra treikam, na ka liang ka MSOA ki la ïashim bynta ha ka Special Annual General Meeting (SAGM) kaba la pynïaid da ka Dr PT Usha, ha kaba la ïakren halor kiba bun ki kam ka IOA SAGM bad la ïoh ruh ïa ka kaiphod na u Amitabh Sharma, Executive Council Member, & Chairman, GTCC – 37th National Games, Indian Olympic Association, uba la pyntip ba ka jingwan jingïalang jong u dangshen sha Goa bad ki jingïakynduh bad ki heh Sorkar ka long kaba sngewshngaiñ namar ka Sorkar Jylla ka la kren skhem bad rai ban pynlong ïa ka XXXVII National Games mynta u snem ha Goa ha ka taïew ba khatduh jong u Risaw 2023.
Ha ka jingkren plie ïa ka SAGM ka President IOA ka la khot ïa baroh ban ïa tylli na ka bynta ka jingmyntoi jong ki nongïalehkai sport kum shibynta ban lah ban poi sha ka thong jong u Narendra Modi, uba dei u Myntri Rangbahduh ka ri India uba la pynbna ba ka Ri India ka dei ban trei shitom ban kylla long kaba khlaiñ bor ha ki kam ïalehkai ha u 2036.