Khliehriat nailur 14: U Deputy Commissioner ka East Jaiñtia Hills District, Khliehriat da kane u pyntip ba ka National Human Rights Commission (NHRC) ka la plie na ka bynta kiba kwah ban ïashim bynta ha ka “9th Annual Competition for Short Films” ha kaba ïadei bad ki hok longbriew manbriew ne ‘Human Rights’ ha kaba na ka liang ka commission ka la ïoh pdiang ïa ka jubab kaba kaba seisoh na ki bynta bapher bapher jong ka ri.
Ka jingthmu jong kane ka skhim ai khusnam ka long ban pynshlur bad ithuh ïa ki kam cinema bad ïa ki jingpyrshang da ki nongshong shnong jong ka ri khlem da kheiñ ïa ka rta na ka bynta ban kyntiew ha kaba ïadei bad ki hok longbriew manbriew.
Ka tarik ba khatduh ban pdiang ïa kiba kwah ïashim bynta kan long ha ka 30 tarik mynta u bnai, ha kaba dei ban phah lyngba ka online sha ka nhrcshortfilm@gmail.com, da kaba pyndonkam da ka Google drive folder.
Kiba jop ha ka kyrdan kaba nyngkong ba ar bad bad lai na ka bynta ki phlim kiba itynnad kin ïoh pdiang ïa ka khusnam kaba da ka song pisa kaba long T2 lak, T 1.50 lak bad T.1 lak.
Nalor kane ka khusnam kaba da ka pisa, ka Commission kan ai ruh ryngkat ki certificate bad ki trophy kiba don ïa ka jingkdew ba kyrpang, kata nalor ka song pisa kaba long mar T.50 hajar na ka bynta ki katto katne ki phlim lada kan don ka jingai jingmynjur na ka liang ki nongbishar.
Kine ki phlim lyngkot ki lah ban long ha kino kino ki jait ktien jong ka ri India bad kiba don ia ka jingpynkylla ktien ne subtitble ha ka English lane Hindi bad ka jingjrong jong ka phlim kam dei ban duna ïa ka lai minit lane palat ïa ka 10 minit.
ïa ki jingtip ba kham bniah ha kaba ïadei bad ki kyndon na ka bynta kane ka skhim bad halor ki aplikeshon form, kito kiba don jingthmu ki lah ban leit sha ka website jong ka NHRC, kata lyngba ka www.nhrc.nic.in (DPRO, Khliehriat).
