Nongpoh, Lber 05: U wei naki shakri jong u Blei haka rta ba 45 snem u la iehnoh shadien ïaka ïing ka sem bad kiba ïeid ba thoiñ baroh hadien ka jingpang bala neh kham slem bad khlad noh syndon hynne ka step jong ka 5 tarik haka por 4 baje mynstep ha ïing sah jong u ha Umran Dairy.
U Rev. Presley Mawnai u dei u khun phrangsngi jong ka Kong (L) Lorisa Mawnai bad u Broholat Sangma bad u shong u sah haka shnong Umran Dairy ha Ri-Bhoi bad u dei ruh u ba peit ïaka Umshiaw Pastorate, District Lasaiapngar, Ri-Bhoi Mihngi Presbytery, bad bat ruh kum u Mission Director ka Ri-Bhoi Presbyterian Synod.
La ïathuh ha kaba ïadei bad katei ka jingjia, u Rev. Presley Mawnai u la don ruh ka jingshitom haka met kaba la neh kham slem bad ka jingkhlad noh jong utei u shakri jong u Blei ka long ruh ka jingduhnong kaba khraw ïaka Ri-Bhoi Synod baroh kawei ban lur ïaki lyngkha ba sah shrah namar u dei u shakri uba trei hok bad khia ka jingkit.
Shuh shuh la pyntip ruh ba ka jingleit ontep ïa u Rev Presley Mawnai kan long haka 7 tarik Lber naduh ka por 12:30 baje nohphai sngi ha u lum jingtep ka Balang Presbyterian Umran Dairy.
