Don kiba pyrshang ban thied ïa ka Burom da ka spah, hynrei burom ba thied da ka spah kam don dor ei ei : Rev. KE Rympeit

Nongpoh, Lber 05: Haba sam ïa ka ktien ka Jong u Blei mynta ka sngi ha ka jingïaseng noh phai sngi jong ka Jingïaseng ba 25 ka Ri Bhoi Presbyterian Synod Christian Endeavor Union kaba la long ha ka CE. Society Balang Kyrdem, ka Ri Bhoi Mihngi Presbyterian CE Union, u Rev. K.E Rympeit u la ther jur da kaba ong,”Bun ki briew ha kane ka pyrthei ki la pyrshang ban thied wat ïa ka burom lyngba ka spah, hynrei kim tip ba kane ka burom kaba shu thied da ka spah kam long ei ei bad kim don dor ha khmat u Blei”.
Haba sam ne pharia ïa ka ktien ka jong u Blei ha kane ka jingïaseng noh phai sngi jong kane ka jingïaseng Synod ka Ri Bhoi Presbyterian Synod C.E Union halor ka phang, ‘Ka Burom’, u Rev. K.E Rympeit u la sot lyngba ka Kitbab Zakharia na ka lynnong kaba 3:4 ter ter kiba kren shaphang ka burom bad bun ha ki sngi kiba mynta ki briew ki pyrshang ban thied da ka spah ïa ka burom bad kim tip pat ba ka burom kaba thied da ka spah kam long ei ei hakhmat u Blei.
U la ong ruh ka burom kaba la pynkup da u Blei ka dei ka burom kaba ym lah shuh ban knieh ne pynduh ïa ka bad lada ka dei ka burom kaba ka pyrthei ka pynjup ïa phi da ka spah kane kan jah noh bad kam larkam satia.
Haba kren halor ka burom, u Rev. K.E Rympeit u la kyntu jur sha ki paid riengeit ba ngim dei ban beh ïa ka burom pyrthei bad kum kiba Ngeit ha Jisu Christ uba long u khun jong u Blei ngi dei ban beh sha ka burom jong u Blei da kaba ngi im ka jingim kaba khuid bad kaba don dor hakhmat u Blei.
U la bynrap ruh da kaba ong, lada ngi phai sha u Blei bad ngi lah ban leh ïa ka mon ka jong u Blei, u Blei un pynkup ïa ngi da kata ka burom kaba neh shi junom bad ba ki bor jong ka pyrthei kin nym lah ban leh ei ei ïa ka burom ba la pynkup da u Blei.
La sngewthuh shai ruh lyngba katei ka jingkren u Rev. K.E Rympeit, u angnud ba kum kiba ngeit ha U Blei bad ruh kum kita kiba khot ïa lade ba ki dei ki khun Khristan kim dei ban lehkai ïa ka burom ba la pynkup da u Blei. Kawei na ka nuksa kaba u la shim ka dei lyngba ka jingsneng na U Khun Sarong Awria ha kaba ha kaba nyngkong eh ka burom kaba u la ioh na u Kpa ka dei ka burom jong ka spah kaba u sngew ba u la ioh lut ha kane ka pyrthei, hynrei kane ka long tang shi por bad ha kaba khatduh u hap ban wan phai biang sha la u Kpa ban pan map bad ban ong ruh, “Ko pa nga la leh pop pyrshah ïa phi bad ïa ka Bneng bad ngam dawa shuh ba phin dang khot ïa nga kum u khun jong phi” kaba u sngewthuh shai kdar ba ka burom pyrthei kam long ei ei bad dei tang ka burom Blei kaba neh shi junom.
Namar kata, kum uwei na u Pastor rangbah ka Ri Bhoi Synod, u la kyntu ïa ki paid riewngeit ka Balang Presbyterian synod Ri Bhoi, ba ki dei ban phai sha u Blei ha kaba ha ka jingïaid lynti jong ka jingim kin ïa kynduh shibun ki jingtynjuh bad ki jingeh, hynrei kim dei ban duh jingkyrmen bad ki dei ban phai sha u Blei ban ioh ïa kata ka burom Blei bad dei tang ka burom Blei kaba lah ban pynkup ïa kata ka burom ba shi junom ha ka jingim, u la bynrap.
Lyngba jong kane ka sngi la sakhi ruh da ki hajar ngut ki paid riewngeit ka Balang Presbyterian ba hap ha Ri Bhoi Presbyterian Synod mynta ka sngi ki la ïa tuid ban leit sakhi sha ka Jingïaseng ba 25 jong ka CE Society Balang Kyrdem, Kyrdem District CE Union, ka Ri Bhoi Mihngi Prebytery CE Union jong ka Ri bhoi Prebyterian Synod Christian Endeavor Union kaba la long ha ka CE Society Balang Kyrdem.
Kane ka jingïaseng synod ba 25 ka Ri Bhoi Presbyterian Synod Christian Endeavor Union ka dei kaba la sdang naduh ka 3 tarik u Lber 2023 lyngba ki prorkam bad ki nongkren bapher bapher hapoh kane ka lai sngi bad la pynkut noh mynta ka sngi U Blei ha kaba ki nongkren ki kynthup ïa u Rev. B Syiem uba la sam ïa ka ktien ka jong u Blei ha ka jingïaseng mynstep bad u Rev. K.E Rympeit u la sam ïa ka ktien ka joing u Blei ha ka jingïaseng noh phai sngi bad bud sa u Tbn. N.B Myrsing uba la sam ïa ka ktien ka jong U Blei ha ka jingïaseng mynmiet jong kane ka Sngi U Blei.
Haba pynkut pynwai noh ïa kane ka jingïaseng Synod ki khun samla ka Ri Bhoi Presbyrian Synod la pynphuh pynphieng ruh da ka jingdon lang kiwei kiwei ki pastor bad ki nongsharai Balang, ki paid riewngeit bad khamtam ki jingwai Choir na ki Choir bapher bapher lyngba ki sur ba syiang bad ba bang ka la pynum mynsiem kiba bun ki paid riewngeit kiba la wan ban sakhi sha kane ka jingïasengbah ki Khun Samla ka Ri Bhoi Synod ha Kyrdem.