Shillong, Nohprah, 15: U Chief Spokesperson jong ka BJP Meghalaya State Unit u Bah Mariahom Kharkrang u la ai khublei ïa u Myntri ka Sorkar Pdeng uba peit ïa ka Road Transport and Highways u Nitin Gadkari bad ïa u Myntri Rangbahduh ka ri u Narendra Modi ban mang pisa T. 1,241 klur na ka bynta ban shna pynheh ïa ka surok Phulbari-Tura ha surokbah National Highway 127B ha Meghalaya.
Ïa kane ka surok kaba don ha shilynter jong ka shnong Phulbari-Tura ha surokbah National Highway 127B yn sa shna noh kum ka surok ar lain bad kan pynsuk ruh ïa ka leit ka wan sha Tura, kaba dei ka District Headquarter jong ka West Garo Hills bad kiwei kiwei ki bynta jong ka jylla Meghalaya lyngba ka surok NH-217 (Tura-Dalu) bad Tura-Jengjal-Rongjeng-Nongstoin-Shillong.
U Bah Khrakrang u la ong, “ha ki 76 tylli ki snem ba la ïoh ïa ka jinglaitluid ha ka ri bad ha ka jingdap 50 snem ka jingïoh Jylla bapura, ki sorkar barim ki la kyntait ban ithuh ïa ka jylla Meghalaya ban ïoh ïa ki jingmyntoi ha ka liang ka surok bad ki lynti ki synkieng. Kawei ka sorkar hadien kawei pat, ki la leh bym suidñiew ïa ka jingdonkam ki surok kiba kongsan tam na ka bynta ki paidbah nongshong shnong bad kumjuh ruh ki surok kiba pynïasoh na ka bynta ka khaii ka pateng.
“Ngi sngew sarong ba ngi don ïa ka Sorkar Pdeng kaba sngewthuh ïa ka jingdonkam jong ka jylla jong ngi bad kaba trei shitom ban weng ïa ki jingeh kiba ngi ïakynduh. U Myntri Rangbahduh ka ri, u Modi u la long u paralok jong ka thaiñ Shatei Lammihngi naduh ka sngi kaba nyngkong bad ki projek kam pynroi kiba ha kane ka thain Shatei Lammihngi ki la long ki sakhi. Ka jingbhah pisa ka pynkhlaiñ ïa ka jingsngewthuh ïa ngi don ïa ka Sorkar Pdeng kaba peit lem ïa ka bha ka miat jong ka Jylla Meghalaya. Ka BJP Meghalaya Unit kan ïai bteng ban trei na ka bynta ban pynskhem ïa ka kti u Narendra Modi,” u la bynrap.
