86 klur ban pynbha bad pynheh ïa ka surok Weilong-Trongpleng ap ban mynjur ka Sorkar

Shillong, Nohprah 15 : U MLA ka UDP na Mawsynram u bah Olan Sing Suin mynta ka Sngi Thohdieng ula ïathuh ba la dep phah ka jingtyrwa 86 klur tyngka na ka bynta ban pynbha bad pynheh ïa ka surok ba 33 km na Weiloi shaduh Trongpleng khnang ba kan kylluid ban ïaid ar tylli ki kali bad halor kane ka sorkar ka dang shong bishar ban ai ïa ka jingmynjur.
“ Nga la dep ai sha ka sorkar ïa kane ka jingtyrwa ban pynbha bad pynheh ïa kane ka surok na Weiloi sha Trongpleng kaba jngai 33 km ha ka jinglut kaba 86 klur tyngka namar ka dei kawei na ki surok ba donkam tam” ong u bah Suin.
U la ïathuh halor kane u la leit ïakren ruh bad u Symbud Myntri Rangbah ba dei peit ïa ka tnad PWD u bah Prestone Tynsong.
U la ïathuh kaba sah ka surok naduh Trongpleng shaduh Lad Bagli, ki Engineer jongka tnad PWD ki dang pynkhreh ïaka Detail Project Report (DPR). U la ïathuh ruh ba ka jingpynheh ïa ka surok naduh Mawphlang shaduh Weiloi ruh ka dang ïaid shakhmat mynta.U la banjur ïa ki kontraktor ba kin pynsted ïa ka jingpyntrei namar ki don katto katne ki jaka ba ki dang shu sdang ban tih ïa ka khyndew ruh. Na ka bynta kane ka surok la mang 48 klur tyngka kaba jngai 30 km bad la buh thong ban pyndep hapoh u Kyllalyngkot 2025.
Hooid wat la ka kam ka la ïaid shakhmat hynrei donkam ban pynsted ïa ka jingtrei khnang ba yn lah ban pyndep hapoh a por ba la buh bad halor kane u la ïathuh ba u la ïakren ruh bad u Chief Engineer ka PWD.
U bah Suin u la ïathuh ba ka jingpynbha bad pynheh ïa kane ka surok kan long ka jingkyrkhu ïa ki paidbah na katei ka thaiñ khamtam eh ki nongrep ki ban ïoh wan kit ïa ki mar rep jong ki sha ki ïew ki hat namar kane ka thaiñ ka dei kaba im bha ha ka rep ka riang. Nalor kane kan khring bha ïa kiba bun ki nongwan jngohkai ban wan sha ki jaka jngohkai sha ka thaiñ Mawsynram.