Phah tuklar ka KSU ha ka Dr. Ampareen ba phah thoh eksamin thep kam ka NEIGRIHMS shabar jylla

Shillong, Nohprah, 15: Ka Khasi Students Union (KSU) ha ka sngi Thohdieng ka la kyntu ïa ka Myntri ka Koit ka Khiah jong ka Sorkar Jylla ka Dr. Ampareen Lyngdoh ba kan tuklar pyrshah ïa ka jingphah thoh eksamin sha ki Centre kiba don shabar ka jylla Meghalaya ïa ki nongthepkam trai jylla ha ka post Group B & C hapoh ka North Eastern Indira Gandhi Regional Institute of Health & Medical Sciences (NEIGRIHMS).
“Ngi kyntu ïa phi ban tuklar lem ïa ka jingphah thoh eksamin na ka bynta Group B & C ha NEIGRIHMS ha kaba la ïoh jingtip ba ki nongthep kam trai jylla kiba napoh ka jylla ki la hap ban leit thoh ïa ki eksamin shabar jylla Meghalaya,” ong u General Secretary ka KSU u samla Donald V Thabah ha ka dorkhas ba la phah sha ka Myntri ka Koit ka Khiah.
U la pyntip ba ka KSU ka la pyrshang ruh ban ïakynduh ïa ka Myntri ka Koit ka Khiah hynrei namarba ka don shabar ka nongbah Shillong, kumta la shu pynsngew ïa ka lyngba ka telephone.
U la ong ba ka Myntri ka la kular ïa ka KSU ba ma ka, ryngkat bad u Myntri Rangbah ka Jylla u Conrad K. Sangma kin sa shimkhia ïa kane ka kam ha New Delhi.
“(Ka la kular) ba kan ïakynduh ïa ki Ophisar jong ka Union Health Ministry ban weng ïa kane ka jingeh bad ban kyrpad ba baroh ki nongthep kam trai jylla ki dei ban ïoh lad ban thoh eksamin ha ki Centre kiba don hapoh ka jylla,” u la ong da kaba pyntip ïa ka jingïathuh jong ka Myntri.
U General Secretary ka KSU u la ïathuh ba un sa rah ïa kane ka ishu sha u Myntri Rangbah ba un tuklar mardor ïa kane ka kam.
Ha kajuh ka por, ka KSU ka ladep phah ïa ka jingthoh sha u Director jong ka NEIGRIHMS u Dr. Nalin Mehta ban pyrkhat lem ïa kane ka jingeh kaba la mad da ki nongthep kam trai jylla.
Dang shen ha ka jingïakynduh ïa u Director, ka KSU ka la ïoh jingtip ba ki nongthep kam trai jylla ki la ïoh ïa ki Centre thoh eksamin ha Shillong, Guwahati, Jorhat bad Delhi.
Ïa ka jingthoh eksamin yn pynlong da ka HLL Agency.
“Hynrei, kaba pynsngewsih ïa ngi ka long ba ki nongthep kam kiba dei na kiwei pat ki Centre, la ailad ba kin jied hi ïa ki jaka thoh eksamin, kata, ha Shillong, Guwahati & New Delhi,” la ong ka KSU.
“Bun na ki nongthep kam trai jylla ki jied hi ïa ka Shillong kum ka jaka thoh eksamin kaba nyngkong bad ka Guwahati kum ka jaka thoh eksamin kaba ar hynrei kaba pynsngewsih ïa ki, ka long ba la ai ïa ki ban jied ïa ka Jorhat ne Dibrugarh kum ka jaka thoh eksamin.
Ka KSU ka la pynkynmaw ruh ba bun na ki nongshong shnong ka jylla ki dei kiba wan na ki longing longsem kiba kham duna ka ïoh ka kot bad kane kan buh jingeh ruh ïa ki nongthep kam namarba kin hap ban pynlut ïa ka pisa ha ka bai leit bai wan bad ka thiah ka dem.
Ka KSU ka la pynkynmaw ruh ïa u Director halor ka jingkular ban pynlong ïa ka sorbe ha ki Computer Centre bapher bapher kiba don ha Shillong na ka bynta ban pynlong ïa ka CBT System Examination.