Nongstoiñ, Naiwieng, 4: Ka kynhun ki Pulit Anti Narcotics Task Force (ANTF) ka West Khasi Hills, hynne ka step sngi thohdieng, ki la ïoh ban kem ïa uwei u Nongkhaïi droks bad uwei u nongñiah kali, kiba thmu ban pynpoi ïa u droks ha sor Nongstoiñ.
Ïa kine ki briew la ïoh kem na kawei ka kali ML05-M-1175 ha ka jingtalasi kali kaba la pynlong ha Jaidohkroh, kaba hap hapoh ka shnong Ksehkohlong, Nongstoiñ Police Station. La ong ba ka jingïohkem ka dei hadien ka jingïaid buddien bad ïai thwet ïa kine ki briew na ka por sha ka por.
La ong ba kane ka kali ka dei kaba ñiah da u Teiborlin Mythong ba 36 snem ka rta u ba dei na Mawrang Rambrai bad u ba shong ba sah ha Mawprem, Pdengshnong, Shillong.
Ha ka jingkhynra ïa ka kali, ki Pulit ki la ïoh ban kurup ïa 7 gram u heroin ba la thep ha ki 7 tylli ki synduk tin, ar tylli ki thyrnia injek, ar tylli ki mobile phone bad ka pisa T.1505 na ka met jong uwei pat u ba shong ha kane ka kali.
Une u briew ba ïoh ban kurup drok u kyrteng u Riboklang Lyngdoh ba 22 snem u ba dei na Mawiong Lumsyntiew, Nongstoiñ. Nalor kine, ki Pulit ki la ïoh ruh ban kurup haduh 33 tylli ki tube plastic ba thylli na kane ka kali. Kumba long haduh mynta, ïa kine ki briew la kit noh sha Nongstoiñ Police Station bad la pynngat ïa ki hapoh ka kyndon NDPS Act.
