Pyndik ki Pulit Assam ïa ka jingthmu pynpoi umbam ha shnong Umthli

Nongstoiñ, Naiwieng 4: Ka seng FKJGP Langpih Area, ka la ther tyngeh ïa ki Pulit ka Assam, kiba la wan ban pynibor biang ha ka thaiñ bad pynsangeh jubor ïa ka skhim Um ba la pyntrei ha ka shnong Umthli, kaba hap hapoh ka thaiñ.
Katkum ka jingïathuh ki nongïalam ka Seng, la ong ba ki Pulit ka Assam ki la wan ban pynsangeh ïa u contractor ba pyntrei ïa kane ka skhim Um mar ïa ïoh jingtip ba u dang phah kit ïa ki pipe um kiba dang poi ha ka shnong Ukiam.
“Kane ka jingleh ki Pulit Assam ka pyni ïa ka jingleh donbor khlem da burom ïa ka jingdonkam ki paidbah nongshong shnong kiba dei ban ïoh ïa ka jingmyntoi na katei ka skhim”, ong u Bah Serbilin Lyngdoh President ka FKJGP Langpih.
U la ong, “Ngi dawa jur ïa ki bor District ka West Khasi Hills ban tuklar mardor ïa kane ka kam, khnang ba kan poi um noh sha kane ka shnong. Ngi pynrem jur ruh ïa ka Sorkar Jylla kaba lap miet ban mushlia ïa ka suk ka saiñ ha ka thaiñ”, u la ong.
“Ha kajuh ka por, ka FKJGP ka la pynrem jur ruh ïa ka jingwan pyntrei jubor jong ka Sorkar Assam ïa ka surok MGNREGA ha ka Shnong Noapara khlem da ïoh jingbit na ka Dorbar Shnong. Kane ruh ka pyni ïa ka jingkwah leh donbor jong ka Assam khlem da burom shuh ïa ka bor ki Dorbar Shnong ha ka thaiñ khappud.
“Na ka liang ka Seng ka ai ka jingïaroh ïa ka Dorbar Shnong Noapara kaba la ieng ryntih ban nym ailad ïa ka jingwan leh donbor jong ka Assam. Ngi ruh kum ka seng ryngkat ki paidbah ka thaiñ Langpih, ngin ym aili satia ba kin shu wan leh katba mon ha ka jaka jong ngi”, u la ong.