Pyni sap 22 ngut ki samla ka South West Khasi Hills ha ka ‘District Talent Event’
Mawkyrwat, ‘Naiwieng, 04: Ka Aspire Meghalaya lyngba ka ‘District Talent Event’ ha ka 3 tarik u ‘Naiwieng, 2022 ka la pynlong ïa ka prokram ban jied ïa ki khynnah samla na ki skul bapher bapher bad kumjuh ruh ki samla pule na ka Sngap Syiem College, Mawkyrwat, South West Khasi Hills District kiba don ka sap ka phong ba kyrpang la ka long ha ha rwai ka siaw, ka shad bad ka put ka tem bad kiwei de ki jinglah ba ki don ha kaba ïa kane ka prokram la pynlong ha ka Hall jong ka Nativity Mawkyrwat ha kaba 22 ngut ki samla ki la mihshakhmat ban ïashimbynta.
Ïa katei ka prokram la pynlong ha ki 12 tylli ki distrik kaba la sdang naduh u bnai Lber, 2022 bad kaba la bei pisa da ka Department of Sports and Youth Affairs, jong ka sorkar Meghalaya bad ba la kyrshan da ka State Education Mission Authority Meghalaya (SEMAM) kaba la aiti ruh ha ka Meghalaya-based Social Enterprise, AVENUES ba kan pynïaid ïa ki prokram ha kaba 14 tylli ki skul hapoh ka South West Khasi Hills District ki la ïa shimbynta kynthup ïa ka Sngap Syiem College, Mawkyrwat. Lyngba kane ka prokram jong ka ‘Aspire Meghalaya’ shibun ki khynnah samla ki la ïoh lad ban pynpaw ïa ka sap kaba ki don.
Ha kane ka ‘District Talent Event’ la sakhi ba ki don haduh 22 ngut ki samla kiba don ka sap ha ki bynta bapher bapher bad kiba la ïoh pdiang ruh ïa ki Cheque kaba T. 5000/- ba la mang da ka sorkar bad ba la sam da u bah Renikton Lyngdoh Tongkhar, Myntri ka tnad Umbam Umdih ka Jylla Meghalaya uba la long kum u kongsan.
U bah Renikton Lyngdoh Tongkhar, Myntri jong ka tnad Umbam Umdih jong ka Jylla Meghalaya haba kren ha ka jingïalang u la ai mynsiem na ka bynta ki samla jong ka dong ka thaiñ kiba la ïoh ban pyni ïa ki sap ki phong ba ki ki don ba kim dei ban pynleh noh ei noh ïa ki kumba ki la pyni paidbah ha kane ka rynsan hynrei ki dei ban ïai long ki samla kiba pyndonkam hok ïa ka sap khnang ba kan long ka jingkyrkhu bad ka jingkyrshan na ka bynta ka lawei jong ki ha ka lashai la shisngi.
Ha kajuh ka por u la ong ba ka jingtrei shitom ryngkat ka jingkut jingmut ka lah ban wanrah ïa u soh jong ka jingjop. Namarkata, kum ki khynnah skul bad ki samla pule ki dei ban long kiba minot ruh ha ka jingpule khnang ba kin kiew na kawei ka kyrdan sha kawei pat bad ba kin sa long ki nongïalam ba hakhmat ha kawei ka sngi. “Haba U Blei U buh ïa u briew ha kane ka pyrthei Um shym la buh suda hynrei U buh ryngkat ka sap ka phong bad ïa kata ka sap U Blei U kwah ïa ngi ba ngin pyndonkam, namar lada ngim pyndonkam ïoh Un shim noh na ngi”, ong u bah Renik.
U bah Renik ha ka jingkren jong u u la ai ruh ka jingïaroh na ka bynta ka jinglah jong ki khun samla ban long kiba shlur da shisha ban pyni ïa kita ki sap ki phong ba ki ki donkam khlem ka jinglehraiñ, hynrei ki la long pynban ka jingaimynsiem na ka bynta kiwei de ba kin long kiba shlur bad skhem ha ka nongrim ba ki don lyngba ka sap kaba U Blei U la ai ha ki.
Kiwei pat kiba la ïadonlang ki long u Block Development Officer (BDO), ka Mawkyrwat C&RD Block, u bah I. Lawrynñiang kumjuh ruh na ka ophis jong u District Sports Officer, South West Khasi Hills District lem bad kiwei kiwei de kiba la shah khot sngewbha kata naduh ki khynnah skul, ki samla pule bad kumjuh ruh ki nonghikai.