Khliehriat, Risaw, 25: Arngut ki nongtrei jong ka karkhana pynmih dewbilat Dalmia Dalmia Cement Ltd, Thangskai kaba don ha East Jaiñtia Hills District ki la mynsaw katba ki dang thang ïa ka dur tyngshop jong u ‘lei Rabon ha ka sngi pynkut ïa ka lehniam puja hadien ba ladep pynngam um ïa ki blei ha ka sngi Baar.
Kine ki arngut ki nongtrei ka Dalmia kiba la mynsaw ki long u Senior Manager-Machanical u Kedar Mal Maheshwari 60 snem ka rta bad uwei pat u dei u Security Guard uba kyrteng u Deepak.
Haba pyrshang ban wad jingtip shuh shuh halor kane ka jingjia, ki bor pynïaid jong ka Dalmia ki la kyntait bad ïakren.
Ka thymmei khubor ka ïathuh shuh shuh ba ïa kine ki arngut kiba mynsaw la pynkit noh marmar sha Nemcare Hospital Guahati.
Kumjuh ruh kumba la paw lyngba kawei ka Video, ki nongtrei jong ka Dalmia Cement Ltd ki la leh kmen puja da kaba thmu ban thang ïa u tyngshop jong u ‘lei Rabon bad ka thymmei khubor ka ïathuh ba imat kine ki nongtrei jong ka kompeni ki la pyndonkam da ka umphniang petrol bad ha ka por ba ki theh umphniang ïa u tyngshop u klong umphniang u la kem ding bad pei bad kumta ka ding ka la sied pathar sha ki ar ngut kat haduh ba ki la mynsaw jur na ka jingkem ding kynsan ha ka met jong ki.
La ïohi ruh ba ka la don kawei ka kali pynlip ding ruh ha kane ka jaka ba jia katba ki dang ïaleh kmen puja.
Ka thymmei khubor ba la ïoh lum shuh shuh ka la ïathuh ba ki nongtrei jong ka Dalmia kim shym la ïoh jingbit na ki bor synshar distrik bad na ki bor jong ka aiñ ban pyndonkam ïa ka ding ha ka jingrakhe puja jong ki namar katkum ka jingïoh jingtip la sngewthuh ba ki ïoh jingbit tang ban bret blei ym ban pynndonkam ïa ka ding ha ka tamasa lehniam puja.
Ki Pulit kiba la ïoh jingtip halor kane ki dang tih bniah bad ki dang pynlong ïa ka jingtohkit halor kane ka jingjia.
