Shillong, Risaw 25 : Ka Meghalaya ka la kynjoh sa uwei u mawmer hadien ba ka la lah ban pynpoi umbam sha ki 4lak tylli ki longïing ha ka jylla lyngba ka skim Jal Jeevan Mission.
Tad haduh mynta la dep ban mang 3,000 klur tyngka na ka bynta ban pyntreikam ïa ka skim JJM ha ka jylla.
Lah ruh ban kdew hangne ba tad haduh ka 15tarik Nailur 2019 ki la don tang 4450 tylli ki longïing kiba ïoh umbam ha ki ïing ki sem jong ki hynrei mynta pat ka la kot sha ka 4,00,812 tylli.
Kumta, halor katei ka jingjop, na ka liang u Myntri Rangbah ka Jylla, Conrad K Sangma u la ai ka jingïaroh ïa ka kynhun ba pyntrei ïa ka jingpyntreikam ïa ka Jal Jeevan Mission ha Meghalaya kaba la trei borbah ban pyntyllun ïa ka kam shakhmat.
“Ka Meghalaya ka la kot sha ka 4lak tylli ki longïing kiba ïoh um lyngba ka Jal Jeevan Mission Functional Household Tap Connection (FHTCs). Ngi ai ka jingkhublei ïa ka kynhun Jal Jeevan Mission Meghalaya bad ngi buh thong ba ngin ïai bteng ban kynjoh 100 persen ka jingpynpoi umbam umdih sha baroh ki longïing ha ka jylla.
Na ka liang u Myntri ka tnad PHE ka sorkar Jylla, u Marcuise N Marak pat u la ong ba ka tnad ka buh thong ban kynjoh haduh 5lak tylli ki longïing ka jingpynpoi umbam ha u Nohprah mynta u snem. “Ka thong jong ka sorkar ka long ban pynïoh umbam umdih sha ki 6.51lak tylli ki lohngïing,” u la ong da kaba bynrap ba tad haduh mynta ka sorkar pdeng ka la dep ban mang haduh 3,000 klur tyngka na ka 6,000 klur tyngka kaba la mang na bynta ka jylla.
Haba bynrap lang, u Commissioner & Secretary ka tnad PHE ka sorkar jylla ba dei ruh u Mission Director ka Jal Jeevan Mission, u Syed Md. A Razi u la pynpaw ïa ka jingkmen kaba khraw halor kane ka jingjop.
La pynpaw ba ka jingpynpoi umbam ha ki ïing ki sem ka ïapher na kawei ka distrik sha kawei pat. Ha East Garo Hills ka jingpynpoi umbam ka la kynjoh sha ka 80.09 persen, South West Garo Hills da ki 79.02 persen, Ri Bhoi da 72.83 persen, North Garo Hills da ki 69.35 persen, Eastern West Khasi Hills da 67.56 persen, South Garo Hills da 65.56 persen, South West Khasi Hills da 65.15 persen, West Garo Hills da 59.82 persen, West Khasi Hills da 57.52 persen, West Jaintia Hills da 50.29 persen, East Khasi Hills da ki 50.01 persen bad East Jaintia Hills da 44.50 persen.
Dang ha u Risaw 2022, kata shisnem mynshwa, ka Meghalaya ka la shah pynkup burom da ka khusnam ba ar haka jingpyntreikam ïa ka Jal Jeevan Mission kaba long ka jingai jingithuh ïa ka jingtreikam bha jong ka jylla.
