Shillong, Risaw 24: Ka Skulbah North-Eastern Hill University, ha ka Lah Sngi U Blei, ka la pynlong ïa ka jingïaphylliew jingmut bad ka kynhun kaba na ka Ri Croatia ha Auditorium jong ka Kiang Nangbah NEHU Old Guest House bad katei ka kynhun na Croatia ka la pyni rong da ka shad tynrai jongki kaba la tip kum ka “Sword Dance” ne ka shad talaiñ wait ha katei ka sngi.
Katei ka kynhun jong ki 16 ngut ki Knight`s Association Kumpanjija“- Blato (Croatia) ki la wan jurip ïa ka NEHU, da ka jingthmu ban ïaphylliew bad ban ïasam mar kylliang ïa ki jingtip bad ki bor pynïaid bad ki samla pule jong katei ka skulbah.
La ïathuh ba ka jingthmu jong ka jingwan jurip ka jong katei ka kynhun na Croatia ka long ban pynsngewthuh bad ban pynshai paidbah shaphang ka Folklore Festival bad Cultural Heritage jongka Blato, ka dewlynnong jongka Korcula, Republic of Croatia, kaba dei kaba la bna nam ïa ka jinglong kyrpang ka mariang sawdong sawkun, ka kolshor, ka histori bad ka bam ka dih kaba don ha ka jaka pdeng jongka Central bad Southeast Europe.
U Nongïalam jongka Knight’s Association Kumpanjija – Blato na Croatia u Nicola, ula pynpaw ïa ka jingsngewtynnad ïa ka jingpdiang sngewbha jong ka NEHU bad khamtam ïa ka jingïaphylliew kaba don jingmut.
Ula ïawer ïa ki bor pynïaid jong ka NEHU ryngkat bad ki samla pule ba kin leit jngohkai ïa ka ri Croatia ha ki snem ban wan.
U Vice Chancellor ka NEHU Prof. PS Shukla, ula pynïaid ïa katei ka prokram bad ula ai khublei ïa katei ka kynhun jong ki 16 ngut na Croatia kiba la wan jngoh ïa ka NEHU ban pyni kyrpang ïa ka Kumpanjija Sword Dance, kaba dei ka shad tynrai kaba pyni ïa ka mynsiem jong ki nongïaleh kiba ïeng ban ïada ïa ka dewlynong pyrshah ïa ki nongshun ha ki por kiba rim ba jah.
Katei ka waitlam ka dei kaba pyni ïa ka bor, jingshlur, jingkhlaiñ, ka jingïada bad kumta ter ter bad ïa katei ka Sword Society la seng naduh u snem 1927.
Katba u Prof. B. Panda, Director ka ICSSR-NER bad u N. Munish Singh, Zonal Director, ICCR, North-East ki la ai jingkren bad pdiang sngewbha ïa katei ka kynhun kaba la wan jngoh ïa ka skulbah NEHU.
