Shillong, Risaw 25 : Ka North Eastern Hill University Students’ Union (NEHUSU) kan pynlong ïa ka jingïaid paidbah lashai ka sngi kum ka dak ban pynpaw ïa ka jingpyrshah halor ka jingbym shim khia ki bor pynïaid ka University ban pyntreikam ïa ki mat jingdawa bapher bapher kiba dei na ka bynta ka bha ka miat ki samla pule.
U President ka NEHUSU samla First June Nongbsap ula ong ba ka Union ka la kyrpad ïa baroh ki samla pule bad ki seng kiba don hapoh ka Univeristy ba kin ïasnohkti lang ha kane ka jingïakhih bad ban boycott ruh ïa ka jingiashong klas.
La pyntip ba kane ka jingïaid paidbah kan sdang na Central Library sha Administrative Block.
Haba kren halor ki ishu, u samla First June ula ong “Halor ka kam hostel, ngi dawa ban pynjanai ha ka rukom ai ïa ki jingbam ba bha, ban pynïoh wifi bad kiwei ki jingdonkam na ka bynta ka jingshngaiñ bad jingaram jong baroh ki nongsah hostel”.
Ula ong ba ka Union ka la dawa ruh ban buh noh ïa ka Library ba kyrpang na ka bynta ka School of Technology (SOT), ban long shai bad khuid ha ka jingai marking system ïa ki samla pule bad kiwei kiwei.
Halor ka jingthungkam ïa u Rohit Prasad, une u President ka NEHUSU ula ong “Ngi sngewkhia halor ka jingthung ïa u Rohit Prasad sha ka Ophis jong u Vice Chancellor. Ka jingbym long shai ha ka rukom thungkam bad ki kyndon ban thungkam ïa une u briew ka dei ka kam kaba ngi dawa ban tuklar mardor”.
