Shillong, Risaw, 25: Uwei u rangbah briew ïa uba la tip kyrteng kum u Bah Lahbor Khongngai 40 snem ka rta uba dei na ka shnong Wahlong, East Khasi Hills District kaba don sharum jong ka shnong Sohra u la shu mynsaw ei kha-ma-kha hadien ba u la shah thombor bad shah tied da u tyrnem ha ki briew khlem kano kano ka daw.
Ïa une u rangbah uba la mynsaw la pynkit noh sha Shillong Civil Hospital hynnin ka miet sngi Baar hadien ba u la shah thombor ha ka por kumba 10:00 baje mynmiet.
Katkum ka jingïathuh jong u Bah Lahbor, la ong ba kane ka la jia tang hadien ba ka kurim jong u ka la hylla ïa kine ki ba kin ym kren da ki tien sih tien sang hadien ba la suba ba ki dei kiba la shoh khawyiang.
U la kam ruh, tang namarba ka kurim jong ka la hylla ïa ki ban ym kren da ki tiensih, kine ki briew kiba don kumba lai ne saw ngut kiba sah ruh marjan bad ka ing jong u, ki la shu thombor beit ïa u Bah Lahbor bad bom ruh da u tyrnem na ki bynta jong ka lbong haduh ba un da ym tip briew shuh.
U la ïathuh, dei lyngba ka jingïarap jong ka kurim, u la shu lait thaw na ki tyrsim jong ka jingduhei ïa la ka jong ka jingim.
U la ong shuh shuh ba kiba la sakhi ïa kane ka jingjia, dei tang ka kurim bad ki khun ki kti jong u.
Ha kaba ïadei bad kane ka jingjia, ki Pulit ki la pynlong ïa ka jingtohkit khnang ba lap ïa ka jingshisha.
