Shillong, Risaw 25 : Ka jingkhapngiah ha kylleng ka sor Shillong na ka daw ka jingbun ki nongdie madan ka la buh ïa ka ïaid ka ïeng ki paidbah ha ka jingma namar ki don ki jaka jaka ba ki hap ban ïaid noh na surok ïaid kali bad kane ym tang ba ka ktah ïa ka ïaid ka ïeng ki kali kaba wanrah ka jingdheng kali kaba jur hynrei ïa ki jngim briew ruh.
Ha thaiñ Laitumkhrah ruh kane kajuh ka jingeh ki paidbah ki la ïa kynduh na kata ka daw ka Dorbar Shnong kam banse ban shim ïa ka rai ban pyrkhing noh ïa ka jingwan tur ki nongdie madan bad kan pyrkhing bha ruh ïa ka rukom shong die madan jongki ba kim dei ban pynkhapngiah ïa ki lynti ïaid kjat ki paidbah.
U Rangbah Shnong ka Laitumkhrah u Bah Andrew A Jyrwa, ula ïathuh ba ka Dorbar Shnong kan pyrrkhing noh ïa ka jingwan kyntur ki nongshong die madan ha ki surok hapoh u pud u sam hadien ba ka Sorkar ka la pyntreikam ïa ka Meghalaya Street Vendors (Protection of Livelihood and Regulation of Street Vending) Scheme 2023.
U Bah Andrew ula ban jur ba ka jingkyntur jong ki nongshong die madan ka dei ka bym lah tehlakam satia ha ki lynti ïaid kjat naduh Laitumkhrah shaduh sha Fire Brigade.
Ula batai ba naduh mynstep, ki nongshong die madan ki la sei ïa la ki mar ki mata ha ki lynti ïaid kjat bad buh jingeh ïa ki paidbah kiba leit ba wan man ka sngi. Ki nongïaid nongïeng ki la shem jingeh ban ïaid na ki lynti ïaid kjat bad la pynbor ïa ki ban ïaid na ki surok, kaba la nang pynkhapngiah shuh shuh ïa ka surok.
Ka Laitumkhrah ka dei kawei ka jaka ba hui hui bha manla ka sngi namar ka jingdon jong ki skul, ki college, ki ophis Sorkar, ki ophis jong ki kompani shimet bad kiwei kiwei.
U Bah Andrew ula pyntip ba ka Dorbar Shnong kan buddien bha ïa ka plan jong ka Sorkar haba ïadei bad ka kam shong die madan, ka ban sa ai da ka jaka ba kyrpang ïa ki ba kin buh dukan, ym shuh ba kin shu shong die ha kat ki jaka kiba lait.
Ha ki snem ba la leit noh, ka Dorbar Shnong Laitumkhrah ka la pynlong ïa ka jinglum kyrteng ia ki nongshong die madan hapoh u pud u sam jong ka. Napdeng ki spah ngut kiba la pynrung kyrteng, 90% ki dei ki briew ba nabar bad tang khyndiat eh ki dei ki nongshong shnong ka Laitumkhrah, ula pyntip.
Ula ong ba lada ka Sorkar Jylla ka bthah ïa ka Dorbar Shnong ban lum kyrteng biang ïa baroh ki nongshong shnong die madan, ka Dorbar Shnong ka kloi ban ïatreilang bad ka Sorkar halor kane ka kam.
Watla ka dei ka ‘non vending area’ (bym shah shong die madan), ka Dorbar Shnong Laitumkhrah ka dei kaba nyngkong tam na ki Dorbar Shnong ban lum kyrteng ban ithuh ïa baroh ki nongshong die madan.
U Bah Andrew u pyntip ba ka Dorbar Shnong Laitumkhrah ka la dep ithuh ïa ka jaka (ha Veronica Lane) ban ai jaka shong die madan ïa ki briew ba kin nym kyntur shuh sha ki lynti ïaid kjat.
