Shillong, Risaw, 25: Ki Pulit jong ka East Khasi Hills District kiba la pyntreikam ïa ka hukum ba la pynjari hapoh ka district kaba mana ban die kyiad be-aiñ ha ki sngi lehniam Puja, ki la ïoh ban kurup ïa ka kyiad, ka kyiad pyrsi bad ka Beer ba la die be-aiñ ha ki bynta bapher bapher jong ka nongbah Shillong.
Katkum u kyrwoh ba la phah da u Superintendent of Police (City), East Khasi Hills District, Bah Vivek Syiem, ha ki sngi lehniam puja, ki Pulit ki Pulit kiba la pynlong ka jingkhynra bad ka jingïaid pahara ban peitngor ïa ka shongsuk shongsaiñ khnang ban ïada na kino kino ki jingjia ba sngewsih ha kylleng ka Sor Shillong.
“Ha ka jingkhynra ha Paltan Bazar, Jeep Stand, thaiñ Mawblei, Khlieh Iew, basa die doh, ha Mawlonghat, Urkaliar, ha iew Laitumkhrah, Mawbah, Jhalupara, Iew Polo, ki Pulit ki la ïoh ban kurup haduh 102,910 ml ka kyiad IMFL, 260 litar ka kyiad pyrsi bad 15,100 ml ka Beer,” la pyntip u SP.
