Mynsaw lai ngut ki Heprit na Pahamrïoh ba shah syllad ha ka kali

Nongpoh, Risaw, 25: Lai ngut ki heprit kiba dang hapoh 12 snem ka rta ki la mynsaw hadien ba kawei ka kali rit bym lah satia ban ithuh ka la tynrah ïa ki katba ki dang ïaid kjat harud surokbah National Highway-6 hajan ka shnong Pahamrïoh, Ri-Bhoi District.
Katkum ka jingtip ba la ïohlum, la ïathuh ba kane ka la jia ha ka sngi Baar ha ka por 11 :00 baje mynstep katba kine ki heprit ki dang ïaid lynti harud ka surokbah NH 6. La ïathuh ba ka kali ka la phet krad na kane ka jaka.
Kine ki lai ngut ki heprit kiba la mynsaw na ka jingshah tynrah kali, ki long u heprit Treiborlang Suting 12 snem bad u heprit Shanborlang Suting , 11 snem kiba dei ki shipara trai bad uwei pat la tip kyrteng kum u heprit Budlang Ryndong 11 snem kiba shong basah ha ka shnong Pahamrïoh Them.Na ka liang jong ki paidbah ki la ïohi ïa kine ki heprit kiba la mynsaw harud surok ki la leit ban ïarap marmar bad pynkit noh ïa ki sha Civil Hospital Nongpoh na ka bynta ban ïoh ïa ka jingsumar.Ki Pulit jong ka Nongpoh Police Station ki dang pynlong ïa ka jingtohkit kaba bniah halor kane ka jingjia bad ban thwet ïa ka kali kaba la tynrah ïa ki lai ngut ki heprit.