Dei ka eriong Hamoon na Bay of Bengal ba pynkylla ïa ka mariang ha Meghalaya

Shillong, Risaw 25 : Ka India Meteorological Department (IMD) naduh ka miet Sngi Ba Ar ka la pyntip ba ka eriong Hamoon kaba wan beh na duriaw Bay of Bengal kan wan ïaid lynti na kane ka thaiñ ban leit sha Bangladesh bad kan neh kumba 6 kynta ei ei.
Kane ka eriong kan wanrah ka jingkylla ka mariang kata don ki jaka ban jur eriong bad u slap bad ka dei kaba wan kiew na Bay of Bengal bad kan leit sha Bangladesh lyngba ka Khepupara bad Chittagong ha ka jingbeh sted kaba 65 haduh 75 kmph lane poi shaduh 85 kmph, ïathuh ka IMD.
Na kane ka daw jongkane ka eriong ki jylla ba lah ban slap ki dei ka Manipur, Mizoram, Tripura, Assam bad Meghalaya hangne ha thaiñ North East bad kumjuh ruh ka Kerala bad Tamilnadu ha ki bynta ba shathie. Ha kine ki jylla kane ka thaiñ, don ki jaka ban jur u slap don pat ki ban slap malu mala bad kane ka lah ban bteng haduh ka 26 tarik mynta u bnai.