Shillong, Jymmang 9: U Myntri Rangbah ka Jylla Meghalaya u Conrad K Sangma mynta ka sngi Thohdieng, ula kaweh lama kum ka dak ban pyllait ïa y synsar ba 1700 metric ton ban shalan na Khlieh Umsten Ribhoi district shabar ka jylla.
Ïa une u synsar la shalan sha ka Central Warehousing Corporation ha Guwahati Assam naka bynta ban buh bad die lilam sha ki nongthied synsar kiba thlied dor ba heh tam.
Ia kane ka jingshalan ïa u synshar la leh hapoh ka CM-ASSURE kaba dei ka prokram jong ka Sorkar Jylla ban kyrshan ïa ki nongrep ha ka jinghiar dor u synsar ha ïew bad kane ka CM-ASSURE ka pynleit jingmut ha ki mar ki mata ki bym pyut bad kiba kham neh slem.
Ha kane ka sngi u Myntri Rangbah ka Jylla u la aiti ruh ïa ki kali Pick-up sha ki nongïoh jingmyntoi na ka CM-Elevate.
Haba kren ha kane ka sngi, u Myntri Rangbah u la pyntip ruh halor ki kam jong ka Sorkar ban kyntiew ïa ka ka rep ka riang bad ka bha ka miat jong ki nongrep hapoh ka Jylla.
U Conrad u la pyntip ba ka Sorkar kala shim ïa ki sienjam ban wanrah ïa ka jinglong jingman kaban pynlah ïa ka jingkiew ka rep ka riang bad ka jingpynmih ïa kiwei pat ki mar na ki marrep.
U la kdew ba kawei na ki jingtynjuh ba ka Jylla ka ïakynduh ka dei ka jingpynkiew ïa ka jingpynmih ïa ki marrep, kaba long kongsan bha naka bynta ban myntoi ki nongrep bad ka kam rep hapoh ka Jylla. Ula pynthikna ba ki kynhun bapher bapher kila ïatreilang ban weng ïa kane ka jingeh.
“Ka Sorkar kan ïatreilang bad ki nongrep, ki paidbah bad ki nongseng kam seng jam ban wanrah ïa ka jingkylla ha ka ïoh ka kot ha ki thaiñ nongkyndong lyngba ki rukom rep kiba bha tam” la ong u Conrad.
\ Ki sienjam baka Sorkar ka shim ban kyntiew ïaka rep ka riang kum ka CM-ASSURE bad ka CM-Elevate, ki pyni ïa ka jingshimkhia jong ka Sorkar ban kyrshan ïa ki nongrep bad ban kyntiew ïa ka jingpynmih mar rep. Kine ki sienjam ki dei kiba thmu ban kyntiew ïa ka ïoh ka kot ki nongrep, pynkhraw ïa ka kamai ka kajih, bad ban noh synniang sha ka jingroi ka ïoh ka kot ka Jylla.
