Mawkyrwat, Jymmang 09: U Additional District Magistrate (ADM) jong ka South West Khasi Hills District Bah L.T Tariang ha ka sngi Thohdieng u la pynjari da ka korphiw miet hapoh ka Section 163 BNSS ka ban treikam naduh ka por 8:00 baje mynmiet haduh 6:00 baje mynstep haduh 2 kilomitar na u Zero Line.
Kane ka kyndon ka khang pyrshah ïa ka jingleit jingwan jong ki briew ha khappud da ka jingthmu ban ïaid lait ïa u pud u sam jong ka ri India bad Bangladesh lane ban rung tuh sha u pud u sam jong ka ri India.
Ym tang kata, yn ym shah ban ïaid paidbah khlem jingbit lane ban ïalum briew be-aiñ palat ngut shane, ban rah ïa tiar kiba lah ban pyndonkam kum ki tiar pynmynsaw kynthup ïa ki dieng/ki nar bad ki maw hapoh u pud u sam ka Indo-Bangladesh .
La khang pyrshah ïa ki kam be-aiñ, ka jingshalan be-aiñ ïa ki masi, ki mar ba la khang, ka shini, ka kyiad bad kiwei kiwei.
Namar ka jingkyrkieh jong ka kam, kane ka hukum kan treikam noh mardor haduh ar bnai naduh ka sngi ba la pynbna paidbah.
