Kan dei ka burom ïa ka Jaidbynriew lada mihkhmat ka longkmie sha Parliament : Bah Pynïaid

Shillong, Lber 20 : Ka National People’s Party (NPP) ka la sdang nyngkong eh na constituency u CEM ka KHADC, Bah Pynïaid Sing Syiem ban pynshai paidbah ïa ka nongrim jong ka party na bynta ka elekshon MP kaban sa long ha ka 19tarik u Ïaiong mynta u snem.
Ha katei ka jingïalang ïalap elekshon kaba long ha kane ka sngi Nyngkong ki paidbah na kylleng ki shnong jong ka Mawryngkneng constituency ki la lum lang khrui ha Iing Dorbar Shnong Umpling ban ïoh sngew markhmat ïa ka jingpynshai mat elekshon na ki nongïalam ka party khamtam na ka kyrtong, Dr. Ampareen Lyngdoh.
Nalor u Bah Pynïaid ba dei ruh u MLA barim bad MDC ba mynta la don lang ruh u Working President Bah Hamlet Dohling kumjuh u Spokeperson ka party, Bah HM Shangpliang, Bah Gavin Mylliem MLA, Bah Fantin, Bah Kit Nongrem, Bah Embhah,Bah Kimfa, Bah Allan nalor ka jingdonlang ki katto katne ki nongïalam shnong.
Ha kane ka sngi, ki nongïalam ka party ki la pynshai ruh halor ka jingmih ki jingkynnoh bad ki jingkynthoh khlem nongrim jong kiwei ki seng saiñpyrthei ïa ka NPP.
Na ka liang u Bah Pynïaid haba kren ha ka jingïalang u la pynkynmaw ba kum u MLA ba ïoh ban mihkhmat kumba shisnem tam u la ïohi da lade ba ka Mawryngkneng constituency ka dang donkam bun bha ka roi ka par la ka long ha ki shnong ki thaw haduh ki longiing longsem.
“Kan dei ruh ka burom ïa ka Jaidbynriew Khasi kaba ñiewkor ïa ki kynthei lada i Kong Ampareen lyngba ka jingkyrshan jong phi in ïoh ban poi sha Iing Dorbar Parliament. Kane kan pynsuk ruh ïa i ban rah ïa ki ishu bapher bapher ha Parliament namar i la dei lypa i briew iba la ih bha ha ka saiñpythei kum ka MLA bad kum ka Minister la bun sien bad khamtam ba i don ha ka sorkar.” u la ong.
Na ka liang u Bah Pynïaid u la kyntu ruh ïa ka kyrtong MP ban ïa khun lem na ka bynta ban pynkhlaiñ shuh shuh ïa ka Khyrnit kaba Hynriew kaba don mynta ha ka jingpynbeit ha Delhi bad ruh ban pynrung ïa ka Ktien Khasi ha ka Khyrnit kaba Phra jong ka Riti Synshar ka Ri.
Na ka liang ka kyrtong pat ka la ong ba ka sngewkmen ba kane kadei ka sien kaba nyngkong ba ka Shillong seat ka la phah da ka longkmie kum ka kyrtong MP.
“Kum ka longkmie nga don shibun ka jingkitkhlieh bad sngewthuh bha ïa ka khia ka shon bad ki jingeh ba ki kynthei bad ki longiing longsem ki kynduh man ka sngi kumjuh ia ki longiing ba duk, bad khamtam eh na ka bynta ka jingeh ki nongrep jongngi,” ka la ong da kaba bynrap ba dei na kane ka daw ka buh hakhmat ba ynda ka la jop kan ïakhun kyrpang hapoh Parliament ban ïa kren ïa kiba bun ki mat kiba ïadei bad ki longkmie bad ruh ki riewkynthei.
Kum ka kyrtong ka la ong ruh ba kane kadei ka kabu ksiar na bynta ki nongthep vote jong ka Shillong Parliamentary seat ban ïatrei lang khnang ba ka NPP kan poi sha ka thong ha kane ka elekshon MP.