Shillong, Lber 20: U Symbud Myntri Rangbah ka jylla uba khmih ïa ka tnat ki Kam Pohïing u Bah Prestone Tynsong u la kyrpad ïa ka seng Hynñiewtrep National Liberation Council (HNLC) ban sha ka meij jingïakren naba ka sorkar ka la pynkhreh pura ban shim kam pyrshah ïa kano kano kaba long shalyndet jong u pud u sam ka aiñ.
Kane ka jingkren jong u ka la wan hadien ba ka HNLC ka la kam bad shim ka jingkitkhlieh halor ka jingjia pynbthei bom IED ha ka 9 tarik mynta u bnai kaba la jia hapoh ka Them ïew Mawlong bad kaba la ai por ruh shibnai ïa ka sorkar ba kan pynkynriah noh ïa ki 342 tylli ki longïng napoh ka Sweepers’ Colony.
Haba kren sha ki lad pathai khubor ha ka sngi Balang, u Bah Tynsong u la ong ba um kwah ban kynthoh halor ka jingkren jong ka HNLC hynrei ym duna ïa ka 3-4 snem mynta ba kane ka kam pynkynriah ïa ki Harijan ka dang dei hapoh ka jingpyrkhat kaba kongsan jong ka sorkar.
“Ym tang kumta, ngi la pyrshang shitom ban poi sha ka jingshim rai artat kaba khatduh ha kaba ïadei bad kane ka kam,” ula ong.
U Bah Tynsong u la ïathuh ba ki la don bun ki jingïalang bad ka Harijan Panchayat Committee (HPC). “Ha ka jingshisha, mynta, kane ka kam ka dangsah hapoh ka ïingkashari Meghalaya High Court. Ka dang sah ha ka jingshim rai jong ka ïingkashari High Court naba ki dang ap ïa ka jingïalang kaba khatduh hapdeng ka sorkar bad ka HPC,”u la ong da kaba bynrap, “Ha ka jingshisha, ngi la dep kyrpad ïa ki dkhot jong ka HPC ba kin pynpaw ïa ka por, ka tarik na ka bynta ka jingïalang ba ngin ïakynduh. Ym tang ka jingïalang ha ka jingshisha ka High Court ka la dep kdew ba dei ban pyndep noh ïa kane ka kam kham kloi katba lah bad lada ym lah, ka ïingkashari kan sa leh ïa ka kam dalade.”
“Namar kata, nga khmih lynti ba shen, ngin sa lah ban shong biang bad ka HPC bad shisien ba la dep, ngin sa lah ban poi sha ka jingshim rai kaba khatduh,” u la bynrap.
Halor ka jingjia pynbthei bom u la ong ba u la bthah ïa ki pulit ba kum kane ka jingjia kaba la jia kam dei shuh ban bteng bad kino kino ki runar kiba donkti kidei ban shah kem kumba la leh ïa kiwei bad mynta ïa kitei kiba la shahkem ki dang shah tohkit, “Ngam lah ban pynpaw lut ïa baroh ki jingtip sha phi hynrei nga pynthikna ïa ki nongshong shnong ka jylla, na kin long kiba ïoh ki lad jingïada bad ki pulit kin ym thiah bad ngi pynthikna ba kito kiba don ka jingkitkhlieh kin shah kem bad shah pynshitom katkum ka aiñ,” u la ong.
